சென்னை:சென்னையில், ஒவ்வொரு ஆண்டும் செப்டம்பர் 15ஆம் தேதி தமிழக முன்னாள் முதலமைச்சர் அண்ணாதுரையின் பிறந்தநாளை நினைவுக் கூறும் வகையில், அறிஞர் அண்ணா மிதிவண்டிப் போட்டி சென்னை மாநகராட்சி சார்பில் நடத்தப்பட்டு வருகிறது.
இந்த ஆண்டும் பேரறிஞர் அண்ணா அவர்களின் பிறந்தநாளை சிறப்பிக்கும் வகையில் அறிஞர் அண்ணா மிதிவண்டிப் போட்டி அக்டோபர் 14ஆம் தேதி அன்று, காலை 6.00 மணியளவில் சென்னை தீவுடத்திடலில் தொடங்கி, சுவாமி சிவானந்தா சாலையில் உள்ள தூர்தர்ஷன் தொலைக்காட்சி நிலையம், நேப்பியர் பாலம், காயிதே-இ-மில்லத் பாலம், அண்ணாசாலை வழியாகச் சென்று மீண்டும் தீவுத்திடலில் தொடங்கிய இடத்திலேயே முடிக்கப்படும் என்று சென்னை மாநகராட்சி சார்பில் தெரிவிக்கபட்டுள்ளது.
பரிசு தொகை:மாவட்ட அளவில் நடத்தப்படும் இப்போட்டிகளில் பங்கேற்க, இந்தியாவில் தயாரான மிதிவண்டிகள் மட்டுமே உபயோகப்படுத்தப்பட வேண்டும். ஒவ்வொரு பிரிவிலும் முதல் இடம் பெறுபவர்களுக்கு ரூ.5000/-, இரண்டாம் இடம் பெறுபவர்களுக்கு ரூ.3000/-, மூன்றாம் இடம் பெறுபவர்களுக்கு ரூ.2000/- மற்றும் 4 முதல் 10 இடங்களில் வருபவர்களுக்கு ரூ.250/- பரிசும், தகுதிச் சான்றிதழ்களும் வழங்கி சிறப்பிக்கப்படும்.
போட்டிக்கான முன்பதிவு: இது குறித்து சென்னை மாநகராட்சி சார்பில் தெரிவித்தது, "மேற்கண்ட போட்டியில் பங்குபெறும் மாணவ / மாணவியர்கள் தன் சொந்த சைக்கிள் மற்றும் தலைக்கவசத்துடன் கலந்துகொள்ள வேண்டும். போட்டியாளர்கள் அனைவரும் வயது சான்றிதழுடன், வங்கி கணக்குப் புத்தகம் ஆகியவை கொண்டு அக்டோபர் 13ஆம் தேதி வரை சென்னை, பெரியமேட்டில் உள்ள ஜவஹர்லால் நேரு விளையாட்டு அரங்கத்தில் காலை 8 மணி முதல் மாலை 5 மணி வரை முன்பதிவுகள் செய்துக் கொள்ளலாம்.