ராஜீவ் காந்தி கொலை வழக்கு: ராபர்ட் பயஸ் பரோல் கோரிய வழக்கு ஒத்திவைப்பு

சென்னை: ராஜிவ் காந்தி கொலை வழக்கில் சிறையில் உள்ள ராபர்ட் பயாஸ் 30 நாட்கள் பரோல் கோரிய வழக்கை நவம்பர் நான்காம் தேதிக்கு சென்னை உயர்நீதிமன்றம் ஒத்திவைத்தது.

முன்னாள் பிரதமர் ராஜிவ் காந்தி கொலை வழக்கில் 28 அண்டுகளாக சிறை தண்டனை அனுபவித்து வரும் ஏழு பேரில் ஒருவரான ராபர்ட் பயாஸ், தன் மகன் தமிழ்கோவின் திருமண ஏற்பாடுகளை செய்ய 30 நாட்கள் பரோல் வழங்க கோரி மனுத்தாக்கல் செய்திருந்தார்.

இவர் சிறைத்துறை டிஐஜிக்கு அளித்த மனு மீது 40 நாட்களாக எந்த நடவடிக்கையும் எடுக்காததால் பரோல் கோரி தொடர்ந்த இந்த வழக்கானது நீதிபதிகள் சுந்தரேஷ், டீக்காராமன் அமர்வில் இன்று விசாரணைக்கு வந்தது. அப்போது, தமிழ்நாடு அரசு தரப்பில் ஆஜரான வழக்கறிஞர் சிறைத்துறையின் விரிவான பதில் மனுவை தாக்கல் செய்ய இருப்பதால் வழக்கை நவம்பர் முதல் வாரத்திற்கு ஒத்திவைக்க வேண்டுமென கோரிக்கை வைத்தார்.

ஆனால் ராபர்ட் பயஸ் தரப்பில் ஆஜரான வழக்கறிஞர், 28 ஆண்டுகளாக சிறையில் இருக்கும் அவர் முதன்முறையாக பரோல் கேட்பதாகவும், மகனின் திருமண ஏற்பாடுகளை செய்ய வேண்டுமென்பதால் அதை பரிசீலித்து உத்தரவிட வேண்டுமென்றும் கோரிக்கை வைத்தார். பின்னர் இந்த வழக்கை விசாரித்த நீதிபதிகள், தமிழ்நாடு அரசு பதில் மனுத்தாக்கல் செய்ய அவகாசம் வழங்கி வழக்கை நவம்பர் 4ஆம் தேதிக்கு ஒத்திவைத்தனர்.

இதையும் படியுங்க: