'குழந்தையை தவறவிட்ட தாய்'- சில மணி நேரத்தில் கண்டுபிடித்த காவலர்கள்!

சென்னை: ராஜிவ் காந்தி அரசு மருத்துவமனையில் இரண்டு வயது பெண் குழந்தையை விட்டுச்சென்ற தாயிடம் காவல் துறையினர் கண்டுபிடித்து ஒப்படைத்தனர்.

சென்னை ராஜிவ் காந்தி அரசு மருத்துவமனையில் சிகிச்சைக்காக வந்த லதா (36) என்பவரிடம் இரண்டு வயது பெண் குழந்தையை அடையாளம் தெரியாத பெண் ஒருவர் கொடுத்துவிட்டு, டீ கடைக்கு சென்றுவிட்டு திரும்பவரும்போது குழந்தையை வாங்கிக்கொள்வதாக கூறியுள்ளார்.

பின்னர் நீண்ட நேரமாகியும் அந்தப் பெண் திரும்பி வராததால் சந்தேகமடைந்த லதா, ராஜிவ் காந்தி காவல் நிலையத்தில் புகார் அளித்துள்ளார். இந்தப் புகாரின் அடிப்படையில் காவலர்கள் மருத்துவமனை முழுவதும் தேடியும் அப்பெண் கிடைக்காததால், குழந்தை பாதுகாப்பு அவசர உதவி எண்ணிற்கு தொடர்புகொண்டு குழந்தையை ஒப்படைத்தனர்.

மேலும், குழந்தைக்கு தீக்காயம் இருந்ததால் எழும்பூர் குழந்தைகள் நல மருத்துவமனைக்கு சிகிச்சைக்காக அழைத்துசென்றபோது, ஏற்கனவே இந்தக் குழந்தைக்கு தீக்காயத்திற்காக சிகிச்சை அளிக்கப்பட்டதாக செவிலியர் தெரிவித்துள்ளனர்.

இது குறித்து மருத்துவ நிர்வாகத்திடம் காவலர்கள் விசாரித்தபோது புரசைவாக்கம் பகுதியைச் சேர்ந்தவர் ரம்யா (25) என்பவரின் குழந்தை மோனிஷா என தெரியவந்துள்ளது. பின்னர் ரம்யாவை செல்போன் மூலம் தொடர்புகொண்டு குழந்தையை ஒப்படைத்தனர்.

பின்னர் ரம்யாவிடம் மேற்கொண்ட விசாரணையில், ”முதல் கணவர் இறந்துவிட்டதால் இரண்டாவதாக சுந்தர் என்பவரை திருமணம் கொண்டேன். எண்ணெய் சட்டியை கணவர் தட்டிவிட்டதால் குழந்தை மீது கொட்டி தீக்காயம் ஏற்பட்டது. எழும்பூர் மருத்துவமனையில் இரண்டு மாதமாக குழந்தைக்கு சிகிச்சை எடுத்துவருகிறேன்.

மேல் சிகிச்சைக்காக ராஜிவ் காந்தி மருத்துவமனையில் குழந்தையை அனுமதிக்க வந்தேன். கீழ்ப்பாக்கம் மருத்துவமனையின் காவலாளி பழக்கம் என்பதால் அவரை அழைத்து வருவதற்காக சென்றிருந்தேன். குழந்தையை அப்போது மருத்துவமனையில் உள்ள ஒரு பெண்ணிடம் கொடுத்துவிட்டு சென்றேன்” எனத் தெரிவித்துள்ளார்.

இதனையடுத்து ரம்யாவை குழந்தைகள் காப்பகத்திற்கு அழைத்துச்சென்று ஆலோசனை வழங்க நடவடிக்கை எடுக்கப்பட்டுள்ளது.

இதையும் படிங்க:சாப்பாட்டில் விஷம் கலந்து கொடுத்த தந்தை - இரு குழந்தைகள் உயிரிழப்பு