சென்னை மக்களின் முக்கிய குடிநீர் ஆதாரமாக பூண்டி நீர் தேக்கம் உள்ளது. கனமழை பெய்துவருதால் மொத்த உயரமான 35 அடியில் 29.9 அடியை பூண்டி ஏரி எட்டியுள்ளது. கிருஷ்ணா நதிநீர் பங்கீடு திட்டத்தின்படி அக்டோபர் 25ஆம் தேதி ஆந்திர மாநிலம் கண்டலேறு அணையிலிருந்து பூண்டி ஏரிக்கு தண்ணீர் திறக்கப்பட்டது. இதனால், அணையின் நீர்மட்டம் கிடுகிடுவென உயர்ந்து வருகிறது.
இதையடுத்து பூண்டியிலிருந்து, புழல் ஏரிக்கு லிங்க் கால்வாயில் தண்ணீர் திறக்கப்பட்டது. இந்நிலையில், வடகிழக்குப் பருவமழை தீவிரமடைந்து கனமழை பெய்துவருவதால் பூண்டி ஏரிக்கு தொடர்ந்து தண்ணீர் வரத்து அதிகரித்துள்ளது. பூண்டி ஏரியில் இன்று காலை நிலவரப்படி நீர்மட்டம் 29.70 அடியாக பதிவாகியது.
மழை தொடர்ந்து நீடிக்கும் பட்சத்தில் இன்னும் ஒரு வாரத்தில் பூண்டி ஏரி முழு கொள்ளளவை எட்டிவிடும். இதனால், பூண்டி நீர்த்தேக்கத்தின் நீரை செம்பரம்பாக்கம் ஏரிக்கு கொண்டு சென்று நிரப்பும் பணியை பொதுப்பணித்துறை அலுவலர்கள் மேற்கொண்டுள்ளனர்.
பூண்டி ஏரியிலிருந்து புழல் ஏரிக்கு வினாடிக்கு 400கனஅடி தண்ணீரும், செம்பரம்பாக்கம் ஏரிக்கு 300கனஅடி தண்ணீரும் திறந்து விடப்படுகிறது. சென்னை, புறநகர் பகுதிகளில் பெய்து வரும் தொடர்மழை காரணமாக குடிநீர் ஆதாரமாக விளங்கும் புழல், செம்பரம்பாக்கம், சோழவரம் ஏரிகளிலும் நீர்மட்டம் தொடர்ந்து அதிகரித்துள்ளது.