ரபேல் வாட்ச்..காயத்ரி ரகுராம்...வார் ரூம்...சர்ச்சைகளுக்கு அண்ணாமலையின் பதில் என்ன..?

காயத்ரி ரகுராம் தன் தலைமையில் பெண்களுக்கு பாதுகாப்பில்லை என்று கூறியதற்கும், தன்னுடைய கை கடிகாரத்தில் ஒட்டு கேட்கும் கருவி இருக்கிறதா என சோதித்துக் கொள்ளுங்கள் என செய்தியாளர்களிடம் பாஜக மாநில தலைவர் அண்ணாமலை ஆவேசமாக பதிலளித்துள்ளார்.

சென்னை: தி நகரில் உள்ள கமலாலயத்தில் பாஜக மாநில தலைவர் அண்ணாமலை இன்று (ஜன.4) செய்தியாளர்களை சந்தித்தார். அப்போது பேசிய அவர், பல்வேறு அமைப்புகளை சேர்ந்த நபர்கள் தமிழக பாஜகவில் இணைந்திருக்கிறார்கள். குறிப்பாக 1998 ஆண்டில் இருந்து இயங்கி வரும் தமிழக தலித் கட்சியின் தலைவர் உள்ளிட்ட 16 அமைப்புகள் சேர்ந்திருக்கின்றனர் என தெரிவித்தார்.

விருகம்பாக்கத்தில் திமுகவின் எம்பி கனிமொழி கலந்து கொண்ட நிகழ்வில் பாதுகாப்பு பணிகள் இருந்த இரண்டு பெண் காவல் அதிகாரிகள் மீது பாலியல் சீண்டலில் ஈடுபட்டனர். பாஜக இதை வன்மையாக கண்டிக்கிறது. நடக்கின்ற திமுக அரசில் பெண்களுக்கு பாதுகாப்பு இல்லை என்பது மட்டுமல்லாமல் காவல்துறையில் இருக்கும் பெண் அதிகாரிகளுக்கும் பாதுகாப்பு இல்லாத அவலநிலை நிலவி கொண்டிருக்கிறது என வருத்தம் தெரிவித்தார்.

புதுக்கோட்டை மாவட்டத்தில் இருக்கும் ஒரு கிராமத்தில் பல்வேறு குற்றச்சாட்டுகள் தொடர்ந்து எழுந்து வருகிறது. சொல்லப்போனால் குடிநீரில் மனித மலம் கலந்திருப்பதாக பெரும் குற்றச்சாட்டு எழுந்திருக்கிறது. ஆர்.கே.நகர் தொகுதியில் சட்டமன்ற உறுப்பினர் இரண்டு நாட்களுக்கு முன்பாக தூய்மை பணியாளரை எந்த ஒரு முன் பாதுகாப்பும் இன்றி வெறும் கைகளால் சாக்கடையை சுத்தம் செய்ய சொல்லி இருப்பது வன்மையாக கண்டிக்கத்தக்கது. அவர் மீது வன்கொடுமை சட்டம் போட்டு உடனடியாக கைது செய்ய வேண்டும் என கூறினார்.

முன்னாள் நாடாளுமன்ற உறுப்பினர் மஸ்தான் இறப்பு தொடர்பாக பல்வேறு மர்மங்கள் நிலை வருகிறது. ராகுல் காந்தியின் யாத்திரை இந்தியாவை பிரிக்கிறது. அதற்கான முயற்சியில் ஈடுபடுகிறார்களோ என சந்தேகம் எழுகிறது. தான், ஈஷா விவகாரம் தொடர்பான குற்றச்சாட்டு வைத்தால், அதற்கு ஆதாரம் இருக்க வேண்டும். காவல்துறை நேர்மையாக ஒளிவு மறைவாக இல்லாமல் விசாரணை நடத்த வேண்டும் என தெரிவித்தார்.

சமீபத்தில் கட்சியில் இருந்து விலகிய காயத்ரி ரகுராம் எங்கிருந்தாலும் நன்றாக இருக்க வேண்டும். அவரது முரண்பாடான கருத்துக்கள், அவரது சொந்த கருத்துகள் எனவும் பாஜகவின் பல பெண்கள் தொடர்ந்து தங்களை பாஜகவில் இணைந்து கொண்டுதான் இருக்கிறார்கள் என்றும் கூறினார். பாஜக கட்சியில் பெண்களுக்கு பாதுகாப்பு இல்லை என கூறுவது முற்றிலும் தவறு என தெரிவித்த அவர், அனைத்திலும் ஆதார் இணையுங்கள் என்பதில் எந்த ஒரு உள்நோக்கமும் இல்லை. அதை இணைப்பதன் மூலமாக வெளிப்படை தன்மை இருக்கும். இந்தியாவில் ஒவ்வொரு நபர் மீதும் 2 லட்சத்து 63 ஆயிரம் ரூபாய் கடன் இருக்கிறது என தெரிவித்தார்.

தமிழகத்தில் பிரதமர் போட்டியிட வேண்டும் என்பது தங்களது விருப்பமாக உள்ளது. விளம்பரம் வருவது தினகரன் மற்றும் முரசொலியில் தான். பல ரூபாய் பணம் வாங்கிக் கொண்டு டிஆர்பிக்கு ஆதரவாக செய்திகள் போடுகிறார்கள் என குற்றஞ்சாட்டினார். திமுக அமைச்சர் மீது பாலியல் வீடியோ கடந்த ஆண்டு வெளியானது, அதை 48 மணி நேரத்துக்கு பிறகு எந்த ஒரு தொலைக்காட்சியும் ஒளிபரப்பவில்லை. யாராக இருந்தாலும் சேனல் பேரையும் செய்தியாளர் பெயரையும் கூறிவிட்டு கேள்வி கேளுங்கள் என கடுமையாக பேசினார். யூடியூப் சேனல் செய்தியாளர்கள் யாரும் தன்னுடைய செய்தியாளர் சந்திப்புக்கு வர வேண்டாம்.

தன்னுடைய செய்தியை கவர் செய்ய வேண்டும் என யார் காலிலும் விழவில்லை. தன்னுடைய கை கடிகாரத்தில் ஒட்டு கேட்கும் கருவி இருக்கிறதா என சோதித்துக் கொள்ளுங்கள் எனவும் அவர் ஆவேசமாக பேசினார்.

இதையும் படிங்க:ஈரோடு கிழக்கு தொகுதி எம்எல்ஏ திருமகன் ஈவெரா மரணம்!