சென்னைவிமான நிலையத்தில் 2,400 கோடி ரூபாய் திட்ட மதிப்பில், 2.36 லட்சம் சதுர மீட்டரில் கட்டப்பட்டு வரும், ஒருங்கிணைந்த விமான முனையங்களின் முதல் கட்டடப்பணிகள் நிறைவடைந்துள்ளன.
இந்த புதிய முனையத்தில், பேஸ்மென்ட் என்ற கீழ் தளத்தில், பயணியர் உடைமைகள் கையாளப்பட உள்ளன. தரை தளத்தில், சர்வதேச பயணிகள் வருகை பகுதியாக, பயணியருக்கான, வழக்கான நடைமுறைகள் கையாளப்படும். இரண்டாவது தளத்தில், பயணியருக்கான புறப்பாடு நடைமுறைகள் மேற்கொள்ளும் வகையில் வடிவமைக்கப்பட்டுள்ளன.
மற்ற தளங்களில் விமான நிறுவன அலுவலகங்கள், பயணிகள் ஓய்வு அறைகள், மற்றும் நிர்வாகம் சம்பந்தப்பட்ட அலுவலகங்கள் அமைக்கப்பட உள்ளன. மொத்தம் ஐந்து தளங்களுடன் இந்த புதிய முனையம் வடிவமைக்கப்பட்டுள்ளன. புதிய விமான முனையத்தின் முதற்கட்ட கட்டுமானப் பணிகள் நிறைவடைந்து விட்டதால், தற்போது நவீன கருவிகள், உபகரணங்கள் பொருத்தப்பட்டு, கருவிகள், உபகரணங்களின் சோதனைகள் நடந்து வருகின்றன.
இந்தப் புதிய முனையத்தில், பேஸ்மென்ட் கீழ்தளத்தில், விமான பயணிகள் லக்கேஜ்கள் உடைமைகள் கையாளப்படும் பணிகள், இந்த மாதம் 10ஆம் தேதியிலிருந்து செயல்பாட்டிற்கு வந்துவிட்டது. அதேபோல் புதிய முனையத்தில் அமைக்கப்பட்ட மல்டி லெவல் கார் பார்க்கிங், ஷாப்பிங் மால், திரையரங்குகள் போன்றவைகளை கடந்த பிப்ரவரி மாதம் 4ஆம் தேதி விமான போக்குவரத்து துறை அமைச்சர் முறைப்படி தொடங்கி வைத்துள்ளார்.
இந்த நிலையில் இந்த புதிய முனையத்தினை, ஒட்டு மொத்தமாக பிரதமர் நரேந்திர மோடி இம்மாதம், வரும் 27ஆம் தேதி சென்னை விமான நிலையத்தில் நடக்கும் விழாவில் முறைப்படி தொடங்கி வைப்பார் என்று சென்னை விமான நிலைய அதிகாரிகள் தரப்பில் கடந்த 14ஆம் தேதி தெரிவித்தனர். மேலும் பிரதமர் சென்னை வருகை பற்றி அதிகாரப்பூர்வமான அறிவிப்பு, அடுத்த ஓரிரு தினங்களில் வெளியிடப்படும் என்று, சென்னை விமான நிலைய அதிகாரிகள் தரப்பில் கூறினர்.
ஆனால், விமான நிலைய அதிகாரிகள் அறிவித்தபடி, பிரதமர் வருகை பற்றிய அதிகாரப்பூர்வ அறிவிப்பு வெளியிடாததால், வரும் 27ஆம் தேதி புதிய விமான முனையம் திறப்பு கேள்விக்குறியானது. மேலும் புதிய முனையத்தின் கட்டுமானப் பணிகள் நிறைவடைந்தாலும், மின் கருவிகள், இயந்திரங்கள் பொருத்தும் பணிகள் நிறைவடையவில்லை என்று கூறப்படுகிறது.