போலி தங்க நகைகளை காட்டி நாடகம் - பறக்கும் படையினர் விசாரணை

சென்னையில் போலி தங்க நகைகளைக் காட்டி தேர்தல் பறக்கும் படையை ஏமாற்ற முயன்றவர்களிடம் விசாரணை நடைபெற்றது.

கடந்த 9ஆம் தேதி நள்ளிரவு சென்னை அண்ணா நகர் ரவுண்டானா அருகே காவல்துறையினர் வாகன தணிக்கையில் ஈடுபட்டு வந்தனர். அப்போது, சந்தேகத்திற்கு வந்த ஆட்டோ ஒன்றை நிறுத்தி சோதனை நடத்தினர். இந்தச் சோதனையில் 12 கிலோ தங்க நகைகள் இருப்பது தெரியவந்தது.

இதனையடுத்து, நகைகளை கொண்டு சென்ற நபரிடம் நடத்திய விசாரணையில் ’’சவுகார்பேட்டையை சேர்ந்த சந்திரபிரகாஷ் என்பதும் நகை வியாபாரம் செய்து வருவதும் தெரியவந்தது. மேலும், 12 கிலோ நகைகளை விருத்தாசலம் மாவட்டத்தில் விற்பனை செய்ய கொண்டு செல்லும் போது சிக்கியதாக அவர் தெரிவித்தார்.

மேலும், நகைக்குண்டான ஆவணங்களை காண்பித்ததால் காவல்துறையினர் அழைக்கும் நேரத்தில் நகையுடன் விசாரணைக்கு ஆஜராக வேண்டும் என எழுதி வாங்கி கொண்டு சந்திரபிரகாஷை அனுப்பினர். இந்நிலையில் 12 கிலோ நகைகள் சிக்கிய விவகாரத்தை வருமான வரி புலனாய்வு அலுவலர்களுக்கு தெரிவிக்காததால் சர்ச்சை ஏற்பட்டுள்ளது. இது தொடர்பாக அண்ணாநகர் தேர்தல் நடத்தும் அலுவலரிடம் கேட்டுள்ளனர்.

இதனையடுத்து விசாரணைக்காக அண்ணா நகர் தேர்தல் அலுவலர் ஆனந்த்குமார் சந்திர பிரகாஷை நகைகளை கொண்டு வருமாறு தெரிவித்துள்ளனர். அதனடிப்படையில் சந்திரபிரகாஷ் நகைகளை கொண்டு வந்து தேர்தல் அலுவலரிடம் காண்பித்துள்ளார். அப்போது தங்க முலாம் பூசிய கவரிங் நகைகளை தேர்தல் அலுவலரிடம் சமர்பித்து ஏமாற்றியது தெரியவந்தது.

இதனையடுத்து அண்ணா நகர் தேர்தல் பறக்கும் படை அலுவலர் மணிமொழி அளித்த புகாரின் பேரில் அமைந்தகரை காவலர் சந்திரபிரகாஷை விசாரணை நடத்தினர். இந்த விசாரணையில், முறையாக ஆவணம் இல்லாததால், வருமான வரித்துறையிடம் ஒப்படைத்துள்ளனர்.

வருமானவரித்துறை புலனாய்வு அலுவலர்கள் விசாரணையில் சிக்கிக்கொண்டுள்ளனர். குறிப்பாக, 12 கிலோ தங்கத்துக்கான உரிய ஆவணங்கள் மற்றும் வரி செலுத்தப்பட்டுள்ளது. இது குறித்து ஆஜராகி விளக்கமளிக்க வேண்டும் என சந்திரபிரகாஷுக்கு வருமான வரித்துறை அலுவலர்கள் தெரிவித்துள்ளனர்.

இதையும் படிங்க: தமிழ் எழுத்தாளர் இமையத்திற்கு சாகித்ய அகாடமி விருது