Enforcement Directorate: அமைச்சர் செந்தில் பாலாஜியை காவலில் வைத்து விசாரிக்க கோரிக்கை: உயர்நீதிமன்றத்தில் நாளை விசாரணை

அமைச்சர் செந்தில் பாலாஜி அமலாக்கத்துறையால் கைது செய்யப்பட்டு மருத்துவமனையில் சிகிச்சையில் உள்ள நிலையில், அவரை 15 நாட்கள் காவலில் எடுத்து விசாரிக்க அனுமதிக்கக்கோரி அமலாக்கத்துறையினர் தாக்கல் செய்த மனு நாளை விசாரணைக்கு வருகிறது.

சென்னை: பசுமை வழிச்சாலையில் உள்ள அமைச்சர் செந்தில் பாலாஜியின் அரசு பங்களா, கரூரில் உள்ள அவரது பூர்வீக வீடு உள்ளிட்ட அவரது தொடர்புடைய இடங்களில் அமலாக்கத்துறையில் நேற்று (ஜூன் 13) காலை முதல் சோதனை நடத்தினர்.

இந்த சோதனையை தொடர்ந்து இன்று (ஜூன் 14) அதிகாலை அமைச்சர் செந்தில் பாலாஜியை அமலாக்கத் துறையினர் கைது செய்து அழைத்து சென்றனர். அப்போது அவருக்கு திடீரென நெஞ்சு வலி ஏற்பட்டதாக கூறப்படுகிறது. இதையடுத்து ஓமந்தூரார் அரசு மருத்துவமனையில் தீவிர சிகிச்சை பிரிவில் அனுமதிக்கப்பட்டார். இந்நிலையில் சென்னை உயர்நீதிமன்ற நீதிபதி அல்லி செந்தில் பாலாஜியை ஜூன் 28ஆம் தேதி வரை நீதிமன்ற காவலில் வைக்க உத்தரவிட்டுள்ளார்.

இந்நிலையில் அமைச்சர் செந்தில் பாலாஜியை 15 நாட்கள் காவலில் எடுத்து விசாரிக்க அமலாக்கத்துறையினர் நீதிமன்றத்தில் மனுத்தாக்கல் செய்துள்ளனர். அந்த மனுவில் அமைச்சர் செந்தில் பாலாஜி கைது செய்யப்பட்டதற்கான காரணம் குறித்து தெரிவிக்கப்பட்டு உள்ளது.

அந்த மனுவில், அமைச்சர் செந்தில் பாலாஜி மற்றும் அவரது மனைவியின் வங்கிக் கணக்குகளை ஆராய்ந்ததில் செந்தில் பாலாஜி கணக்கில் 1.34 கோடி ரூபாயும், அவரது மனைவி கணக்கில் 29.55 லட்சம் ரூபாயும் டெபாசிட் செய்யப்பட்டுள்ளது. இது அவர்கள் வருமான வரிக் கணக்கை ஒப்பிடும் போது அதிகமானது. கடந்த 2022ஆம் ஆண்டு இந்த வழக்கு தொடர்பாக செந்தில் பாலாஜி உள்ளிட்டோருக்கு பல முறை சம்மன் அனுப்பியும், ஒரு முறை கூட நேரில் ஆஜராகி உரிய விளக்கம் அளிக்கவில்லை.

மாநகர போக்குவரத்து கழகத்தில் நடத்துனர், ஓட்டுனர் பணிகளுக்கு உரிய தேர்வு நடைமுறைகள் பின்பற்றப்படவில்லை. செந்தில் பாலாஜியின் உதவியாளர் சண்முகத்திடம் பணம் கொடுத்துள்ளதாக சில சாட்சிகள் வாக்குமூலம் அளித்துள்ளனர். வழக்கில் குற்றம் சாட்டப்பட்டவர்களில் இடைத்தரகர்களாக செயல்பட்ட சிலர், வேலைக்காக பெறப்பட்ட பணம், செந்தில் பாலாஜி மற்றும் சண்முகம் கணக்கில் செலுத்தப்பட்டதாக தெரிவித்துள்ளனர்.

இந்த பணத்தை செந்தில் பாலாஜி சட்டவிரோதமாக பரிமாற்றம் செய்துள்ளார் என்பதற்கான ஆதாரங்கள் கிடைத்ததால் நேற்று (ஜூன் 13) செந்தில் பாலாஜி உள்ளிட்டோர் தொடர்புடைய இடங்களில் சோதனை நடத்தப்பட்டன. இன்று (ஜூன் 14) சம்மன் வழங்கிய போது, அதை பெற மறுத்த செந்தில் பாலாஜி, அதிகாரிகளை மிரட்டும் தொணியில் சத்தம் போட்டார். இரு சாட்சிகள் முன்னிலையில் அவரது வாக்குமூலத்தை பதிவு செய்ய முயற்சித்த போது எந்த கேள்விக்கும் அவர் பதிலளிக்கவில்லை. விசாரணைக்கு ஒத்துழைக்கவில்லை.

வழக்கு தொடர்பான ஆதாரங்களை கலைக்க கூடும் என்பதால் செந்தில் பாலாஜி கைது செய்யப்பட்டார். அவரிடம் முழுமையாக விசாரணை நடத்த அவரை 15 நாட்கள் காவலில் வைத்து விசாரிக்க அனுமதிக்க வேண்டும் என மனுவில் கோரப்பட்டிருந்தது. இந்த மனு முதன்மை அமர்வு நீதிமன்ற நீதிபதி அல்லி முன்பு நாளை (ஜூன் 15) விசாரணைக்கு வருகிறது.

இதையும் படிங்க:பாஜக அமலாக்கத்துறையின் மூலம் திமுகவை மட்டுமில்லாமல் அதிமுகவையும் மிரட்ட முயற்சிக்கிறது - அமைச்சர் மா.சுப்பிரமணியன்