Chennai Power Cut: இரவு நேர மின்தடை - போராட்டக் களமாக மாறிய அம்பத்தூர் சாலை!

அம்பத்தூர் பகுதியில் தொடர்ந்து இரவு நேர மின்வெட்டு ஏற்படுவதால், அப்பகுதியைச் சேர்ந்த நூற்றுக்கும் மேற்பட்ட மக்கள் திடீரென சாலை மறியல் போராட்டத்தில் ஈடுபட்டதால் பரபரப்பு ஏற்பட்டது.

சென்னை: கோடைக் காலம் துவங்கி பல்வேறு பகுதிகள் வெப்ப நிலை 100 டிகிரி செல்சியஸ்க்கு மேல் சதமடித்து வருகிறது. அதைத் தொடர்ந்தே தமிழ்நாட்டில் கிராமம் முதல் நகரம் பல்வேறு பகுதிகளில் மின் வெட்டும் துவங்கிவிட்டது. ஆகையால் மக்கள் கோடை வெப்பத்தின் தாக்கத்தால் அவதிப்பட்டு வருகின்றனர்.

சென்னை மற்றும் அதன் புறநகர் பகுதிகளில் சொல்லவே தேவையில்லை, வெயில் வாட்டி வதைக்கிறது. இந்த நிலையில் அண்மைக் காலமாகவே சென்னை மற்றும் புறநகர்ப் பகுதிகளில் இரவு நேர மின்தடை அதிகரித்திருப்பதாகப் பல குற்றச்சாட்டுகள் எழுந்துள்ளது. சென்னை புறநகர் பகுதிகளான அம்பத்தூர், ஆவடி, பூந்தமல்லி, திருவேற்காடு, மதுரவாயல் போன்ற பல்வேறு பகுதிகளில் தொடர்ச்சியாக இரவு நேர மின்தடை ஏற்படுவதாகப் பொதுமக்கள் குற்றம் சாட்டுகின்றனர்.

அதாவது அம்பத்தூர் மற்றும் அதன் சுற்றுவட்டாரப் பகுதிகளான கள்ளிக்குப்பம், மேனாம்பேடு, புதூர், பாணுநகர், லெனின் நகர், ஒரகடம் உள்ளிட்ட பல்வேறு பகுதியில் இரவு நேரங்களில் தொடர்ந்து 2 மணி நேரத்திற்கு மேலாக மின்தடை ஏற்பட்டதாக பொதுமக்கள் மின்வாரிய அதிகாரிகளிடம் புகார் தெரிவித்துள்ளனர். இதை சிலர் சமூக வலைத்தளங்களிலும் பதிவிட்டுள்ளனர்.

ஆனால் அதற்கு உரிய நடவடிக்கை இதுவரை எடுக்காததால், ஆத்திரமடைந்த அம்பத்தூர் பகுதி மக்கள் திடீரென மின்வாரிய அலுவலகத்தை முற்றுகையிட்டு போராட்டத்தில் ஈடுபட்டனர். ஒரு கட்டத்திற்கு மேல் போராட்டத்தில் ஈடுபட்ட மக்கள் மின்வாரிய துறை அதிகாரிகளுடன் வாக்குவாதத்தில் ஈடுபட்டனர். இதனால் அப்பகுதியில் பெரும் பரப்பு ஏற்பட்டது.

அதன் பிறகும் எந்த நடவடிக்கையும் எடுக்காததால், இதனிடையே ஆத்திரமடைந்த பொதுமக்கள் கள்ளிக்குப்பம் அருகே அம்பத்தூர் - செங்குன்றம் பிரதான சாலையை மறித்து சாலை மறியல் போராட்டத்தில் ஈடுபட்டனர். இதனால் அப்பகுதி பெரும் போராட்டக் களமாக காட்சியளித்தது. மேலும், இந்த தகவல் அறிந்து சம்பவ இடத்திற்கு வந்த அம்பத்தூர் போலீசார் பேச்சுவார்த்தை மேற்கொண்டனர். அதை ஏற்க மறுத்த பொதுமக்கள் காவல்துறையினர் உடனும் கடும் வாக்குவாதத்தில் ஈடுபட்டனர்.

காலையில் வேலைக்குச் செல்வோர், இரவு நேரத்தில் வெயிலின் வெப்பம் காரணமாகத் தூங்க முடியாமல் கடுமையாகப் பாதிக்கப்படுவதாகப் பொதுமக்கள் வேதனை தெரிவித்தனர். மேலும் அம்பத்தூரில் பல நாட்களாகத் தொடர்ந்து ஏற்படும் இந்த இரவு நேர மின்வெட்டைப் பொறுத்துக் கொள்ளாமல், நேற்று இரவு ஒன்று திரண்டு தொடர் போராட்டத்தில் ஈடுபட்டனர்.

சுமார் 1 மணி நேரத்திற்கு மேலாக இந்த போராட்டமானது தொடர்ந்து நடைபெற்று வந்தது. இதனால் அம்பத்தூர் பிரதான சாலை போராட்ட களம் போல் காட்சியளித்தது. வீடுகளில் தொடர்ந்து அரை மணி நேரம், ஒரு மணி நேரம் என விட்டு விட்டு இரண்டு மணி நேரத்திற்கு மேல் தொடர் மின்வெட்டு ஏற்படுவதைப் பொறுக்க முடியாமல் மக்கள் போராட்டத்தில் ஈடுபட்ட சம்பவம் அப்பகுதியில் பெரும் பரபரப்பை ஏற்படுத்தியது.