தனியார் மூலம் மின்வாரிய ஊழியர்களை நியமிக்கும் அரசாணை ரத்து!

மின்சார வாரியத்தில் உள்ள உதவியாளர் பணியிடங்கள் ஒப்பந்த அடிப்படையில் அவுட்சோர்சிங் மூலம் நிரப்பப்படும் என வெளியிடப்பட்ட அரசாணை ரத்து செய்யப்படுவதாக மின் துறை அமைச்சர் தங்கமணி தெரிவித்துள்ளார்.

தமிழ்நாடு முழுவதும் காலியாக உள்ள வயர்மேன், ஹெல்பர் ஆகிய பணியிடங்களுக்கு 30 ஆயிரம் பணியாளர்களைத் தனியார் நிறுவனம் மூலம் நியமனம்செய்ய முன்னதாக மின்சார வாரியம் உத்தரவிட்டிருந்தது.

மின்சார வாரியத்தின் இந்த உத்தரவால் படித்த இளைஞர்களின் அரசு வேலைவாய்ப்பு பறிபோவதாக குற்றச்சாட்டுகள் எழுந்த நிலையில், தமிழ்நாடு மின்சார வாரியத்தில் உள்ள தொழிற்சங்கங்கள் ஒன்றிணைந்து கூட்டு நடவடிக்கைக் குழுவை இதற்காக அமைத்தனர்.

இந்தக் குழுவினர் தமிழ்நாடு முழுவதும் உள்ள மின்வாரிய அலுவலகங்களில் இன்று (டிச. 21) காலை முதல் போராட்டத்தில் ஈடுபட்டுவருகின்றனர். சென்னை, அண்ணா சாலையில் உள்ள மின்சார வாரியத் தலைமை அலுவலகத்தில் தொழிற்சங்க கூட்டு நடவடிக்கைக் குழு தலைவர்கள் தலைமையில் இன்று காலை தொடங்கி தொடர் போராட்டம் நடைபெற்றுவருகிறது.

இது குறித்து, உப கோட்ட அளவில் தனியார் நிறுவனங்கள் மூலம் மின்வாரியத்தில் ஹெல்பர் மற்றும் வயர்மேன் பணியிடங்களை நிரப்புவதை திரும்பப் பெறும்வரை தங்களின் தொடர் போராட்டம் நடைபெறும் என ஊழியர்கள் முன்னதாகத் தெரிவித்திருந்தனர்.

இந்நிலையில், தனியார் மூலம் மின் ஊழியர்களைத் தேர்வுசெய்யும் அரசாணை திரும்பப் பெறப்படுவதாக அமைச்சர் தங்கமணி தற்போது அறிவித்துள்ளார்.

இது குறித்துப் பேசிய அவர், ”ஏற்கனவே மின்சாரத் துறையில் உள்ள கேங்மேன் பணியிடங்களுக்கு 10 ஆயிரம் நபர்கள் தேர்வு செய்யப்பட்டு தயாராக இருக்கின்றனர். ஆனால், தொழிற்சங்கங்கள் சார்பில் நீதிமன்றத்தில் வழக்கு தொடரப்பட்டு இருப்பதால் அந்தப் பணியிடங்களை நிரப்ப முடியாத சூழல் ஏற்பட்டுள்ளது.

தொழிற்சங்கங்கள் வழக்கை திரும்பப் பெற்றால் ஒரு வார காலத்திற்குள் பத்தாயிரம் கேங்மேன் பணியிடம் நிரப்பப்படும். இந்த வழக்கின் காரணமாகவே மின்சார வாரியத்தில் பணிகள் தேக்கம் அடையக் கூடாது என்பதற்காகவே உதவியாளர் பணியிடங்களை ஒப்பந்த அடிப்படையில் நிரப்ப மின்சார வாரியம் முடிவு செய்தது.

மேலும் தொழிற்சங்கத்தினர் தவறான வழிகாட்டுதலின் அடிப்படையிலேயே ஊழியர்கள் போராடுகின்றனர். இவர்களை சிலர் தவறான முறையில் வழிநடத்துகின்றனர்” எனத் தெரிவத்துள்ளார்.

முன்னதாக சென்னை மின்சார வாரிய தலைமை அலுவலகத்தில் போராட்டத்தில் ஈடுபட்டுள்ள ஊழியர்கள் அமைச்சர் உடனான பேச்சுவார்த்தைக்கு மறுப்பு தெரிவித்தது குறிப்பிடத்தக்கது.

இதையும் படிங்க :மின்வாரியத்தில் ஹெல்பர், வயர்மேன் பணியிடங்கள் தனியாரிடம் ஒப்படைப்பு!