மனைவியை இழந்தவருக்கு 5 லட்சம் இழப்பீடு வழங்க உத்தரவு

மருத்துவமனையில் ஏற்பட்ட மரணத்திற்கான காரணங்களை விளக்காததால், பிரசவத்திற்கு பிறகு மனைவியை இழந்தவருக்கு 5 லட்ச ரூபாய் இழப்பீடு வழங்க மாநில மனித உரிமைகள் ஆணையம் உத்தரவிட்டுள்ளது.

சென்னை: விழுப்புரத்தின் பொன்னான்குப்பம் கிராமத்தை சேர்ந்தவர் கே.பாண்டுரங்கன். இவர் மாநில மனித உரிமை ஆணையத்தில் புகார் மனு ஒன்றை அளித்திருந்தார்.

அதில், “கடந்த ஜுலை 14, 2020ஆம் ஆண்டில் எனது மனைவி கோமதியை முண்டியம்பாக்கத்தில் உள்ள மாவட்ட அரசு மருத்துவமனையில் பிரசவத்திற்காக அனுமதித்திருந்தேன். பிரசவ வலி வராததால் அனுமதிக்கப்பட்ட மறுநாளே அறுவை சிகிச்சை மூலம் குழந்தை பிறந்தது. அடுத்த 5 நாட்களில் எனது மனைவிக்கு நெஞ்சுவலி ஏற்பட்டு மயக்கமடைந்தார்.

5 லட்சம் இழப்பீடு

இதனையடுத்து அவருக்கு வெண்டிலேட்டரில் வைக்கப்பட்டு சிகிச்சையளிக்கப்பட்டது. மருத்துவ சிகிச்சையில் உள்ள அலட்சியத்தின் காரணமாகவே எனது மனைவி உயிரிழந்தார். இதேபோல் ஏற்கனவே மூன்று பெண்கள் உயிரிழந்துள்ளதால் சம்பந்தப்பட்டவர்கள் மீது நடவடிக்கை எடுக்க வேண்டும்" என தெரிவிக்கப்பட்டிருந்தது.

இந்த புகாரை ஆணைய உறுப்பினர் நீதிபதி ஜெயச்சந்திரன் இன்று (பிப்ரவரி 22) விசாரித்தார். அப்போது மருத்துவ கல்வி இயக்குனர் தாக்கல் செய்த அறிக்கையில், நுரையீரலில் ஏற்பட்ட அடைப்பு காரணமாகவே உயிரிழப்பு நிகழ்ந்துள்ளதாக தெரிவிக்கப்பட்டிருந்தது.

மருத்துவமனை தரப்பில் மருத்துவர்களின் கவனக்குறைவு ஏதும் இல்லை எனவும் கூறப்பட்டிருந்தது. அப்போது இருதரப்பு வாதத்தையும் கேட்ட நீதிபதி, மருத்துவர்களின் கவனக்குறைவு காரணமல்ல என்றாலும், புகார்தாரர் மனைவி உயிரிழப்பு நிகழ்ந்துள்ள மருத்துவமனை தரப்பில் உரிய விளக்கம் அளிக்கப்படாததை அவர் சுட்டிக்காட்டினார்.

அத்துடன் புகார்தாரர் பாண்டுரங்கனுக்கு 5 லட்ச ரூபாய் இழப்பீடு வழங்கவும் தமிழ்நாடு அரசுக்கு அவர் உத்தரவிட்டார்.

இதையும் படிங்க:கிணற்றில் குதித்த அரசுப் பள்ளி மாணவன்!