ஒரே நாடு, ஒரே ரேஷன் அட்டை திட்டத்தை ஒராண்டுக்குள் நிறைவேற்றிட மத்திய அரசு தீவிரம் காட்டி வருகிறது. இந்தத் திட்டத்திற்கு தமிழ்நாட்டில் கடுமையான கண்டனங்கள் எழுந்துவரும் நிலையில், அதற்கு தமிழக வாழ்வுரிமைக் கட்சி சார்பில் கண்டனம் தெரிவித்து அறிக்கை வெளியிட்டுள்ளது.
அதில், பிறப்பின் அடிப்படையில் மனிதரில் உயர்வு-தாழ்வினை கட்டிக் காப்பதற்கென்று ஒரு கட்சி. பாஜக என்கின்ற சனாதனக் கட்சி!. மொத்த சூத்திரரும் தொண்டூழியம் செய்ய, ஆர்எஸ்எஸ்ஸால் தோற்றுவிக்கப்பட்ட கட்சி!. ஏற்கனவே ஒரே நாடு, ஒரே மதம், ஒரே மொழி, ஒரே பண்பாடு, ஒரே வரி, ஒரே தேர்தல், ஒரே கல்வி என்று சொல்லிவரும் மோடி, இப்போது ஒரே குடும்ப அட்டை என்றும் சொல்கிறார். ஆனால் ஒரே சாதி என்று மட்டும் அவர் சொல்வதில்லை, சொல்லவும் மாட்டார்.
ஏன் இந்த ஒரே... ஒரே...? எல்லா வகையிலும் ஏற்றத் தாழ்வு நிலவும் இந்த சமூகம், மாறாமல் அப்படியே தொடர வேண்டும் என்ற கெட்ட புத்திதான்; மாநிலங்களை வெறும் நிர்வாக அலகுகளாக மாற்றி, மத்தியிலேயே அதிகாரம் அனைத்தையும் குவித்துக்கொள்ளும் பாசிச உத்திதான்.நாடு முழுவதும் இந்த ஒரே குடும்ப அட்டை திட்டத்தைக் கொண்டுவருவதாகச் சொல்லும் மோடி அரசு, மாநிலங்கள் இதை ஓராண்டிற்குள் அமல்படுத்த வேண்டும் எனக் கெடு விதித்திருக்கிறது.
தமிழ்நாட்டில் நாள்தோறும் படையெடுக்கும் வடமாநில இந்திக்காரர்களைக் கணக்கில் கொண்டே இத்திட்டம் என்பது தெளிவாகிறது. மாநில உரிமையைப் பறித்து, கூட்டாட்சி முறையினை அழித்து, ஜனநாயகத்தையே குழி தோண்டிப் புதைக்கும் மோடியின் ஒரே... ஒரே... பிதற்றல்கள். இன்றைய ஸ்டீபன் ஹாக்கிங் காலத்தை சேவேஜெரி (காட்டுமிராண்டி) காலத்திற்குப் பின்தள்ளுவதே? எனவே இதனைக் கண்டனம் செய்கிறோம், கைவிடக் கோருகிறோம் என்று குறிப்பிட்டுள்ளது.
