GATE தேர்வு எழுதுவதற்கு கட்டணமின்றிப் படிக்கும் வகையிலான இணையதளம் சென்னை ஐஐடியில் தொடக்கம்

GATE தேர்வு எழுதுவதற்கு கட்டணமின்றிப்படிக்கும் வகையிலான இணையதளம் சென்னை ஐஐடியில் தொடங்கப்பட்டுள்ளது.

சென்னை: ஐஐடி தேசிய தொழில்நுட்ப மேம்பாடு கற்றல் திட்டத்தின் மூலமாக கேட் தேர்வுக்குத் தயார்படுத்தும் வகையில் 'NPTEL GATE' என்ற பெயரில் கட்டணமின்றி ஆன்லைன் போர்ட்டல் தொடங்கப்பட்டுள்ளது. என்பிடெல் (NPTEL) என்பது ஐஐடிக்கள், ஐஐஎஸ்சி ஆகியவற்றின் கூட்டுமுயற்சியில், கட்டணமின்றி ஆன்லைன் சான்றிதழ் படிப்புகளை வழங்கும் திட்டமாகும். கேட் தேர்வுக்குத் தயார்ப்படுத்தும் போர்ட்டலை பின்வரும் இணையத் தொடர்பு மூலம் பயன்படுத்தலாம் - https://gate.nptel.ac.in.

ஐஐடிக்கள், ஐஐஎஸ்சி ஆகியவற்றில் முதுநிலைப்படிப்பு அல்லது பிஹெச்.டி.யில் சேரவும், ஏனைய புகழ்பெற்ற உயர்கல்வி நிறுவனங்களில் படிக்கவும் நாடு தழுவிய அளவில் நுழைவுத் தேர்வாக பொறியியல் பட்டதாரி தகுதித் தேர்வு (GATE) இருந்து வருகிறது. பல்வேறு பொதுத்துறை நிறுவனங்களும் கேட் மதிப்பெண் அடிப்படையிலேயே வேலைக்கு நபர்களை நியமிக்கின்றன.

என்பிடெல் வசமுள்ள 2,400க்கும் மேற்பட்ட தலைப்புப் பக்கங்களில் இருந்து பொறியியல், அறிவியல் ஆகியவற்றில் தற்போதைய பாடத்திட்டங்களுக்கு ஏற்ப பாடத் தொகுப்பை வழங்குவதே இதன் நோக்கமாகும். அத்துடன் ’’கேட்’’ பாடத் திட்டத்தின் அடிப்படையில் வீடியோ தீர்வுகள், செய்முறைத்தேர்வுகள், ஆன்லைன் உதவிகள் ஆகியவை புதிய போர்ட்டல் மூலம் வழங்கப்படும்.

இதுகுறித்து, சென்னை ஐஐடி இயக்குநர் காமகோடி கூறும்போது, "கேட் தேர்வு என்பது மாணவர் ஒருவர் இளங்கலைப்படிப்பைப் படிக்கும்போது அவர் பெற்ற அடிப்படை அறிவை சோதிக்கிறது. கேட் தேர்வில் வெற்றி பெறுவோருக்கு உயர்படிப்பு, வேலைவாய்ப்பு ஆகிய இரு வாய்ப்புகளும் கிடைக்கின்றன. என்பிடெல் தனது பாடத்தொகுப்புகளை வழங்கி, மாணவர்களைத் தயார்படுத்த உதவுகிறது. அத்துடன் அவர்களுக்கு சமவாய்ப்பை வழங்கி எல்லோரும் போட்டிக்குத் தயார்படுத்தும் சூழலை உருவாக்குகிறது’’ எனக் கூறினார்.

கேட் தேர்வுக்கான பிரத்யேக இணையதளம் குறித்து சென்னை ஐஐடி என்பிடெல் ஒருங்கிணைப்பாளர் ராமகிருஷ்ணா பசுமார்த்தி, ’’ பாடங்கள் குறித்த விவாதக் களங்களில் பங்கேற்கும் பல மாணவர்கள், கேட் தேர்வுக்கு இதில் உள்ள பாடத் திட்டங்களில் இருந்து NPTEL இணையதளத்தில் இருந்து தெரிந்துகொள்வார்கள். கேட் தேர்வுக்கு தயாராவதற்கான உதவிகளைப் பெறமுடியும்.

கேட் தேர்வு எழுதுவோருக்கு நேரடிக்கற்றலை செயல்படுத்தும் நோக்கில் அண்மையில் நேரடி வழிகாட்டல் அமர்வுகளையும் தொடங்கினோம்.
'NPTEL GATE' இணையதளத்தின் தாக்கத்தை விரைவுபடுத்தவும், அடித்தட்டு மக்களுக்கு சமூகப் பொருளாதார நன்மைகளைக் கொண்டுவரவும், தேசிய அளவில் பலனடையக் கூடிய தளத்தைத் தொடங்க அமெடியஸ் லேப்ஸ் மனமுவந்த நல்லாதரவை வழங்கியுள்ளது. அடுத்த ஆண்டு கேட் தேர்வை ஏறத்தாழ 9 முதல் 10 லட்சம் மாணவர்கள் எழுதக்கூடும் என்பதால், நாடு முழுவதும் தேர்வுக்குத் தங்களை தயார்படுத்துவோருக்கு இந்த போர்ட்டல் சாதகமான தாக்கத்தை ஏற்படுத்தும் வகையில் வாய்ப்பை வழங்கும்” எனத் தெரிவித்தார்.

அபாக் என்ஜினியரிங் தலைவரும், அமெடியஸ் லேப்ஸ் பெங்களூரு-வின் மையத் தலைவருமான மணி கணேஷன் கூறும்போது, ”இந்தியா மற்றும் உலக அளவிலான மாணவர்களை கல்வி மற்றும் தொழில் மேம்பாடு ரீதியாக மேம்படுத்த விரும்புகிறோம். சமூகத்திற்கானப் பொறுப்புகளை செயல்படுத்த அமெடியசில் உள்ள நாங்கள் கடமைப்பட்டிருக்கிறோம்.

நாட்டில் உள்ள அனைத்துத் தரப்பினரும் பலனடையும் வகையில் கட்டணமின்றி பயன்படுத்த ஏதுவாக NPTELன் கேட் தளத்துக்கு நிதியுதவி வழங்குவது, நேர்மறையான தாக்கத்தை விரிவுபடுத்தி, பின்தங்கிய மற்றும் பல்வேறு தரப்பட்ட மாணவர்களுக்கு சமமான வாய்ப்புகளை உருவாக்கும் எங்கள் நோக்கத்தின் ஒரு படியாகும்.

சிறப்பானதொரு எதிர்காலத்தைக் கட்டமைக்கும் சென்னை ஐஐடிக்கு ஆதரவை வழங்கத் தயாராக உள்ளோம்” எனத் தெரிவித்தார்.