என் மகளுக்கு நேர்ந்த கதி யாருக்கும் நேரக்கூடாது - பாத்திமாவின் தந்தை

சென்னை: நன்கு படித்துக்கொண்டிருந்த தனது மகளுக்கு ஏற்பட்ட நிலைமை வேறு யாருக்கும் ஏற்படக்கூடாது என்று பாத்திமாவின் தந்தை லத்தீப் கூறியுள்ளார்.

சென்னை ஐஐடியில் பயின்றுவந்த பாத்திமா என்ற மாணவி, சில நாள்களுக்கு முன்னர் தூக்கிட்டு தற்கொலை செய்துகொண்டார். இதில் உண்மையான குற்றவாளிகளைக் கண்டுபிடித்து உரிய நடவடிக்கை எடுக்க பலரும் வலியுறுத்திவருகின்றனர்.

இந்நிலையில், பாத்திமாவின் தந்தை லத்தீப்பிடம் இன்று விசாரணை நடைபெற்றது. அதைத்தொடர்ந்து செய்தியாளர்களைச் சந்தித்த அவர், "முதலமைச்சர், காவல் துறை தலைமை இயக்குநர் என இதுவரை நான் சந்தித்த அனைவருமே என்னுடைய கைகளைப் பற்றிக்கொண்டு உங்களுக்கான நீதி கிடைக்கும் எனத் தெரிவித்துள்ளனர். எனது மகள் நன்கு படிக்கக்கூடியவள், அவளுக்கு ஏற்பட்ட நிலைமை வேறு யாருக்கும் ஏற்படக் கூடாது.

விசாரணை அலுவலர்கள் கேட்ட தகவல்களைக் கொடுத்தேன். பாத்திமா பயன்படுத்திய கணினி உள்ளிட்ட பொருள்களை விசாரணைக்கு எடுத்து வரச் சொன்னார்கள். விசாரணை முடியும் வரை இங்குதான் தங்கவுள்ளோம். தற்கொலை செய்துகொள்ளும் முன் 28 நாள்களுக்கான டைரி குறிப்புகளும் கொடுக்கப்பட்டுள்ளன. தற்கொலையை முதலில் பார்த்த நபர் எங்களிடம் பேசிய கேட்பொலியை (ஆடியோ) விசாரணைக்காகக் கொடுத்துள்ளோம்" என்று கூறினார்.

விசாரணைக்குப் பின், சென்னை வேப்பேரி காவல் ஆணையர் அலுவலகத்தில் ஆணையர் விஸ்வநாதனை நேரில் சந்தித்து புகார் மனு அளித்தார். அங்கு செய்தியாளர்களிடம் பேசிய அவர், தனது புகாரை முழுவதும் கேட்டபின் காவல் ஆணையர் விஸ்வநாதன் பாத்திமாவை தமிழ்நாட்டுப் பெண்ணாகக் கருதியே விசாரணை நடத்திவருவதாகக் கூறியதாகவும் அடுத்த இரண்டு நாள்களுக்குள் தீவிர விசாரணை நடத்திச் சம்பந்தப்பட்டவர்கள் மீது தக்க நடவடிக்கை எடுக்கப்படும் என விஸ்வநாதன் வாக்குறுதி அளித்துள்ளதாகவும் தெரிவித்தார்.

மேலும், இந்த வழக்கு தொடர்பாக சற்று நேரத்திற்கு முன்பு கேரள காவல் துறை தலைமை இயக்குநர், தன்னை தொடர்புகொண்டு பேசியதாகவும் தமிழ்நாடு காவல் துறை தலைமை இயக்குநரும் இந்த வழக்கை விரைவாக விசாரித்துத் தக்க நடவடிக்கை எடுக்க உத்தரவிட்டுள்ளதாகவும் காவல் ஆணையர் விஸ்வநாதன் தன்னிடம் கூறியதாக லத்தீப் தெரிவித்தார்.

இதையும் படிங்க: ஃபாத்திமா லத்தீப் தாயின் கூற்று தமிழ் மண் மீதான நம்பிக்கையைத் தகர்க்கிறது - மு.க. ஸ்டாலின்