முதலமைச்சர் ஸ்டாலின் 70ஆவது பிறந்தநாள்.. சென்னையில் கூடும் தலைவர்கள்..

தமிழ்நாடு முதலமைச்சர் மு.க. ஸ்டாலின் 70ஆவது பிறந்தநாள் விழாவில் மல்லிகார்ஜூன கார்கே, அகிலேஷ் யாதவ் உள்ளிட்ட முக்கிய தலைவர்கள் கலந்து கொள்ள உள்ளனர்.

சென்னை: திமுக தலைவரும், முதலமைச்சருமான மு. க. ஸ்டாலின், இன்று (மார்ச் 1) தனது 70ஆவது பிறந்தநாளை கொண்டாடி வருகிறார். இவர் முதலமைச்சராக பொறுப்பேற்ற பின் கொண்டாடும் இரண்டாவது பிறந்தநாள் இதுவாகும். இவரது பிறந்தநாளை முன்னிட்டு திமுக நிர்வாகிகள் கொண்டாங்களை கடந்த வாரமே தொடங்கிவிட்டனர்.

இன்று (மார்ச்.1) சிறப்பாக கொண்டாட முடிவு செய்யப்பட்டுள்ளது. அந்த வகையில் சென்னையில் இன்று பொதுக்கூட்டம் நடைபெற உள்ளது. இதில் முக்கிய தலைவர்கள் பங்கேற்க உள்ளனர். குறிப்பாக காங்கிரஸ் கட்சியின் தேசிய தலைவர் மல்லிகார்ஜூன கார்கே, சமாஜ்வாதி கட்சித் தலைவரும் உத்தரப் பிரதேச மாநில முன்னாள் முதலமைச்சருமான அகிலேஷ் யாதவ், ராஷ்ட்ரீய ஜனதா தளம் கட்சித் தலைவரும், பிகார் மாநில துணை முதலமைச்சருமான தேஜஸ்வி யாதவ் உள்ளிட்டவர்கள் வந்து பங்கேற்க உள்ளனர்.

இந்த பிறந்தநாள் பொதுக்கூட்டத்தில் கலந்துகொள்வதற்காக, தமிழ்நாட்டின் பல்வேறு மாவட்டங்களில் இருந்தும் திமுகவினர் சென்னைக்கு படையெடுத்து வருகின்றனர். இதனால் சென்னை முழுவதும் பாதுகாப்பு பலப்படுத்தப்பட்டு, பிரதான சாலைகளில் காவலர்கள் குவிந்துள்ளனர். ஆங்காங்கே கண்காணிப்பில் ஈடுபட்டு வருகின்றனர். இதனிடையே ஸ்டாலினின் பிறந்தநாளை முன்னிட்டு பல்வேறு அரசுகள் கட்சியினரும், திரைபிரபலங்களும், பொதுமக்களும் தங்களது வாழ்த்துக்களை சமூக வலைதளங்கள் மூலம் தெரிவித்து வருகின்றனர்.