தாம்பரத்தில் பணம், பொருள்கள் கொள்ளை !

தாம்பரத்தில் அடுத்தடுத்த கடைகளின் மேல் கூரையை ஓட்டையிட்டு பொருள்கள், பணம் கொள்ளையடிக்கப்பட்டுள்ளது.

சென்னை தாம்பரம் அடுத்த கிருஷ்ணா நகர் பகுதியில் விருகம்பாக்கத்தை சேர்ந்தவர் தியாகராஜ். இவர் சுமார் நான்கு வருடங்களாக அப்பகுதியில் சூப்பர் மார்க்கெட் கடை வைத்து நடத்திவருகின்றார். இந்த நிலையில் இன்று (மே.6) காலை கடையை திறந்து பார்த்தபோது பொருள்கள் எல்லாம் கலைந்திருந்தது. பின்னர் கடையின் உள்ளே சென்று பார்த்தபோது மேற்கூரை ஓட்டையிடப்பட்டிருந்ததைக் கண்டு அதிர்ச்சியடைந்துள்ளார்.

உடனே சூப்பர் மார்க்கெட்டிலுள்ள பீரோக்களை சென்று பார்த்தபோது பூட்டு உடைக்கப்பட்டு, அதிலிருந்து சுமார் இரண்டு லட்சம் ரூபாய் கொள்ளை போனது தெரியவந்தது. அதுமட்டுமின்றி அங்கிருந்த சாக்லேட், விலை உயர்ந்த பாதாம், பிஸ்தா ஆகியவைகளும் காணாமல் போனது தெரியவந்தது.

இதுகுறித்து தாம்பரம் காவல் நிலையத்திற்கு தகவல் தெரிவிக்கப்பட்டது. தகவலின் அடிப்படையில் தாம்பரம் குற்றப்பிரிவு காவல் துறையினர் சம்பவ இடத்துக்கு வந்து, கடையில் உள்ள சிசிடிவி கேமராவில் பதிவான காட்சிகளை கைப்பற்றி ஆய்வு செய்தபோது, ஒரு நபர் மேல் கூரையை ஒட்டையிட்டு உள்ளே சென்று பணம் மற்றும் பொருள்களை திருடி சென்றது தெரியவந்தது.

அதன்பிறகு விசாரித்துக் கொண்டிருந்தபோதே, சூப்பர் மார்க்கெட்டின் பக்கத்தில் தாம்பரம் பகுதியைச் சேர்ந்த ரோகித் என்பவரது துணிக்கடையிலும் கொள்ளையன் அதேபோன்று மேற்கூரையை உடைத்து உள்ளே சென்று பணத்தை தேடி பார்த்துள்ளார். ஆனால் 2,000 ரூபாய் மட்டுமே சிக்கியதால் கலர்கலரான சட்டைகளை எடுத்துக்கொண்டு சென்றது தெரியவந்தது. தற்போது இதுகுறித்து வழக்குப்பதிவு செய்து காவல் துறையினர் விசாரணை மேற்கொண்டு வருகின்றனர்.

கடந்த இரண்டு மாதங்களுக்கு முன்பு அதே பகுதியில் உள்ள சூப்பர் மார்க்கெட்டில் மேல்கூரையை ஓட்டையிட்டு கொள்ளை சம்பவங்கள் அரங்கேறிய நிலையில் அதே பகுதியில் உள்ள அடுத்தடுத்துள்ள கடைகளில் கொள்ளை சம்பவங்கள் அரங்கேறியது அப்பகுதி கடைக்காரர்களிடையே பெரும் அச்சத்தை ஏற்படுத்தியுள்ளது. காவல் துறையினர் தீவிர நடவடிக்கை எடுத்தால் மட்டுமே குற்றவாளிகளை கண்டுபிடிக்க முடியும் என கடைக்காரர்கள் கோரிக்கை விடுத்துள்ளனர்.