சிறப்பு திட்ட செயலாக்கத்துறை அதிகாரிகளுடன் அமைச்சர் உதயநிதி ஆலோசனை!

சிறப்புத் திட்டச் செயலாக்கத் துறையில் செயல்படுத்தப்படும் திட்டங்கள் தொடர்பாகவும், அறிவிக்கப்பட்ட திட்டங்களின் நிலை குறித்தும் அமைச்சர் உதயநிதி ஸ்டாலின் ஆலோசனை நடத்தினார்.

சென்னை: தலைமைச் செயலகத்தில் சிறப்புத் திட்டச் செயலாக்கத் துறை குறித்த ஆய்வுக்கூட்டம் அத்துறை அமைச்சர் உதயநிதி ஸ்டாலின் தலைமையில் இன்று (டிச.17) நடைபெற்றது. சுமார் 2 மணி நேரத்துக்கும் மேலாக நடைபெற்ற இந்த கூட்டத்தில், சிறப்புத் திட்டச் செயலாக்கத் துறை சார்பில் சட்டப்பேரவையில் அறிவிக்கப்பட்ட திட்டங்களின் நிலை, செயல்பாட்டுக்கு வந்துள்ள திட்டங்கள், முன்னுரிமை அளித்துச் செயல்படுத்த வேண்டிய திட்டங்கள் குறித்து விரிவான ஆலோசனை மேற்கொள்ளப்பட்டது.

இதில் அமைச்சர் உதயநிதி ஸ்டாலினுக்கு துறை சார்ந்த அலுவலர்கள், பிபிடி மூலமாக தற்போது நடைமுறையில் உள்ள திட்டங்கள் மற்றும் பயனாளர்கள் எண்ணிக்கை தொடர்பான முழுமையான தகவல்களை வழங்கினர்.

மேலும் சிறப்புத் திட்டச் செயலாக்கத்துறை சார்பில் செயல்படுத்தப்பட்டு வரும் திட்டங்கள் பயனாளிகளுக்கு முறையாகச் சென்றடைகிறதா மற்றும் களத்தில் திட்டத்தைச் செயல்படுத்தும்போது ஏற்படக்கூடிய நடைமுறை சிக்கல்களைக் களைவது உள்ளிட்டவை குறித்தும் ஆலோசிக்கப்பட்டுள்ளது. அதேபோல் பள்ளி குழந்தைகளுக்கான காலை சிற்றுண்டி திட்டம் மற்றும் நான் முதல்வன் திட்டத்தை மேம்படுத்துவது தொடர்பாகவும் ஆலோசிக்கப்பட்டுள்ளது.

இதையும் படிங்க:’இனி வாரிசும் நாங்க தான், துணிவும் நாங்க தான்: ரெட் ஜெயண்ட் அதிரடி முடிவு