சென்னை: சீனாவின் ஹாங்சோவில் 4வது பாரா ஆசிய விளையாட்டு போட்டிகள் கடந்த 22ஆம் தேதி தொடங்கி நடைபெற்று வருகிறது. இந்த தொடர் வரும் 28ஆம் தேதி வரை நடைபெறுகிறது . இதில் இந்தியா சார்பில் சுமார் 300க்கும் மேற்பட்ட வீரர்கள் மற்றும் வீராங்கனைகள் கலந்து கொண்டுள்ளனர். மேலும், தற்போது நடைபெற்று வரும் போட்டிகளில் கேனோ, பிளைண்ட் ஃபுட்பால், ரோயிங் மற்றும் டேக்வாண்டோ ஆகிய 5 விளையாட்டுகள் உள்பட 17 பிரிவுகளில் இந்தியா முதல் முறையாக பங்கேற்கிறது.
இந்நிலையில், இன்று நடைபெற்ற ஆண்களுக்கான வட்டு ஏறிதல் F54/55/56 என்ற பிரிவில் தங்கம், வெள்ளி மற்றும் வெண்கல பதக்கங்களை இந்திய வீரர்கள் கைப்பற்றியுள்ளர். இந்த போட்டியில் நீரஜ் யாதவ் தங்கமும், யோகேஷ் கதுனியா வெள்ளி பதக்கமும், முத்துராஜா வெண்கலப் பதக்கமும் வென்று உள்ளனர். இதில் வெண்கல பதக்கம் வென்ற முத்துராஜா தமிழ்நாட்டை சேர்ந்தவர் என்பது குறிப்பிடத்தக்கது.
இந்த நிலையில், தமிழ்நாடு முதலமைச்சர் மு.க.ஸ்டாலின் தனது எக்ஸ் சமூக வலைத்தளப் பதிவு, "AsianParaGames2022-இல் இந்திய வீரர்கள் தொடர்ந்து பதக்கங்களைக் குவித்து வருவதைக் கண்டு மகிழ்ச்சி அடைகிறேன்.அந்த வரிசையில், வட்டு எறிதல் போட்டியில் வெண்கலம் வென்றுள்ள நம் தமிழ்நாட்டைச் சேர்ந்த முத்துராஜா அவர்களுக்கு எனது பாராட்டுகள். முத்துராஜா மென்மேலும் சாதித்து அடுத்தடுத்த போட்டிகளில் தங்கம் வெல்ல வாழ்த்துகிறேன்" என்று குறிப்பிட்டுள்ளார்.