சென்னை: அண்ணா சாலையில் உள்ள மின்வாரிய தலைமை அலுவலகத்தில் நேற்று (நவம்பர் 12) மின்சாரத்துறை அமைச்சர் செந்தில்பாலாஜி ஆய்வு மேற்கொண்டார். பின்னர் செய்தியாளர்களைச் சந்தித்துப் பேசினார்.
அதில்,“சென்னையை பொருத்தவரையில் 18 இடங்களில் மின் விநியோகம் மழையினால் பாதிக்கப்பட்டுள்ளது. அவை சரிசெய்யப்பட்டு சீரான மின் விநியோகம் செய்யப்பட்டு வருகிறது. நாகை மாவட்டம் திருவெண்காடு பகுதியில் மின் விநியோகம் 2 மணிநேரம் தடைபட்டு, பின் சரி செய்யப்பட்டது.
கொஞ்சம் மழை பெய்தாலே மின் விநியோகத்தை நிறுத்தும் சூழல் கடந்த ஆட்சியிலிருந்தது. ஆனால், தற்போது மின் விநியோகம் நிறுத்தப்படவில்லை. பாதிப்பு ஏற்படும் பகுதிகளில் மட்டுமே மின் விநியோகம் நிறுத்தப்படுகிறது.