ஜிஎஸ்டி சட்ட முன்வடிவு: சட்டப்பேரவையில் அமைச்சர் கே.சி. வீரமணி தாக்கல்!

சென்னை: தமிழ்நாடு சரக்குகள் மற்றும் சேவை வரி இரண்டாம் சட்ட முன்வடிவு, வரிவிதிப்பு சட்டங்களில் சில தளர்வுகளை செயல்படுத்துவது தொடர்பான சட்ட முன்வடிவம் சட்டப்பேரவையில் தாக்கல் செய்யப்பட்டது.

கரோனா பரவலின் தாக்கம் காரணமாக வணிகத்தில் ஈடுபடுவோர் கடுமையாகப் பாதிக்கப்பட்டுள்ளனர். எனவே, வரி செலுத்துவது உள்ளிட்ட பல்வேறு சட்டங்களில் சில தளர்வுகளை தமிழ்நாடு அரசு அறிவித்தது.

தமிழ்நாடு ஜி.எஸ்.டி. சட்டப்படி, வணிகர்கள் பல்வேறு கணக்குகளை உரிய காலத்துக்குள் சமர்ப்பிக்க வேண்டும். நிலுவைத் தொகைகள், வெளியிடங்களுக்கு விநியோகிக்கப்பட்ட சரக்குகள் பற்றிய அறிக்கை சமர்ப்பிப்பது, கூடுதல் வரிப்பணத்தை மீண்டும் கேட்பதற்கு விண்ணப்பிப்பது, மேல்முறையீடு விண்ணப்பம் உள்பட பல நடைமுறைகளை மேற்கொள்ள வேண்டும்.

தற்போதுள்ள சூழ்நிலையில், இவற்றுக்கான காலக்கெடுவை நீட்டிப்பது தொடர்பான தளர்வுக்கு ஏதுவாக, தமிழ்நாடு ஜி.எஸ்.டி. சட்டத்தை திருத்தி, ஆளுநர் பன்வாரிலால் புரோஹித் அவசர சட்டத்தைப் பிறப்பித்தார்.

தமிழ்நாடு மதிப்புக்கூட்டு வரிச்சட்டம் (வாட்), தமிழ்நாடு பந்தைய வரிச்சட்டம், கேளிக்கை வரிச்சட்டம், ஆடம்பர வரிச்சட்டம் மற்றும் பல சட்டங்களில் குறிப்பிடப்பட்டுள்ள காலக்கெடு மற்றும் தமிழ்நாடு வரிவிதிப்புச் சட்டத்தின் காலக்கெடு தொடர்பான விதிகளை தளர்த்துவதற்கான திருத்தத்தை ஏற்படுத்தும் அவசர சட்டத்தையும் ஆளுநர் பிறப்பித்தார்.

கரோனா காலத்தில் சட்டப்பேரவை கூட்டத்தொடர் நடைபெறாததால், அவசரச் சட்டத்தைப் பிரகடனம் செய்வது தேவையானதாக இருந்தது.

அதன்படி, 2020ஆம் ஆண்டு தமிழ்நாடு வரிவிதிப்புச் சட்டங்கள் குறித்த சில வகைமுறைகளின் தளர்வு, அவசரச் சட்டமானதுடன் (தமிழ்நாடு அவசரச் சட்ட எண் 5/2020) ஆளுநரால் கடந்த மே 22ஆம் தேதி பிரகடனப்படுத்தப்பட்டது. இந்தச் சட்டம் மே 23 நாளிட்ட தமிழ்நாடு அரசு சிறப்புதழில் வெளியிடப்பட்டது.

இதைத்தொடர்ந்து தமிழ்நாடு சரக்குகள் மற்றும் சேவை வரி இரண்டாம் சட்ட முன்வடிவு, வரிவிதிப்பு சட்டங்களில் சில தளர்வுகளை செயல்படுத்துவது தொடர்பான சட்ட முன்வடிவையும் அமைச்சர் கே. சி. வீரமணி தமிழ்நாடு சட்டப்பேரவையில் தாக்கல் செய்துள்ளார்.

இதையும் படிங்க: கரோனா தொடர்பான எதிர்க்கட்சி துணைத்தலைவர் துரைமுருகனின் கேள்விக்கு முதலமைச்சர் பதில்!