ஆன்லைன் ரம்மி நிறுவனங்கள் மீது நடவடிக்கை எடுக்கக்கூடாது: உயர்நீதிமன்றம்

ஆன்லைன் விளையாட்டை நடத்தும் தனியார் நிறுவனத்தின் மீது மார்ச் 28 வரை எந்த நடவடிக்கையும் எடுக்க கூடாது என சிபிசிஐடிக்கு சென்னை உயர்நீதிமன்றம் உத்தரவிட்டுள்ளது.

சென்னை: மும்பையை தலைமையிடமாக கொண்டுச் செயல்படும் ஆன்லைன் விளையாட்டு நிறுவனம் தாக்கல் செய்துள்ள மனுவில், ஆன்லைனில் ரம்மி விளையாடிவர்கள் சிலர் தற்கொலை செய்து கொண்டது தொடர்பான வழக்கை விசாரித்து வரும் சிபிசிஐடி, மார்ச் (2023) 2-ம் தேதி 26 கேள்விகளுக்கு பதிலளிக்க வேண்டும் என நோட்டீஸ் அனுப்பியுள்ளது.

அதில், ஆன்லைன் விளையாட்டால் உயிரிழந்த மணிகண்டன், தனியார் நிறுவனத்தில் வேலை செய்து வந்த நிலையில், எப்படி உயிரிழந்தார்? அவர் உயிரிழக்கும் போது அவரின் வங்கி கணக்கு நிலை என்ன? ஆன்லைன் நிறுவனம் சார்பாக ஏதாவது ஊக்கத்தொகை அளிக்கப்பட்டதா? ஆன்லைன் விளையாட்டால் பெற்ற வருமானத்தில் வரி எவ்வளவு கழிக்கப்பட்டது? யாருடன் ஆன்லைன் விளையாட்டில் ஈடுபட்டார்? அவர்களின் பான் எண்? ஆதார் விவரங்கள்? மற்றும் 2016 முதல் ஆன்லைன் விளையாட்டு நிறுவனத்துக்கான வருமானம் எவ்வளவு? உரிய அனுமதி பெற்று நடத்தப்படுகிறதா? என கேள்வி எழுப்பியுள்ளது.

மேலும், உயிரிழந்த மணிகண்டன் கடந்த 2017 ம் ஆண்டுக்கு பிறகு விளையாடாத நிலையில் பல்வேறு கேள்விகளுக்கு பதிலளிக்க உத்தரவிட்டதுடன், காவல்துறை தனது அதிகார வரம்பை மீறி வழக்குப்பதிவு செய்துள்ளது. ஆன்லைன் ரம்மி விளையாட்டு தனிநபரின் திறமை மற்றும் சட்டத்திற்கு உட்பட்டது என்ற உச்சநீதிமன்ற உத்தரவுக்கு எதிரானது. அதனால், சிபிசிஐடி பிறப்பித்த நோட்டீஸை ரத்து செய்ய வேண்டும் என குறிப்பிட்டுள்ளது.

இந்த வழக்கை விசாரித்த நீதிபதி சந்திரசேகரன், சிபிசிஐடி காவல்துறை பதிலளிக்க உத்தரவிட்டதுடன்,
மார்ச் 28ம் தேதி வரை நிறுவனத்தின் மீது எந்த நடவடிக்கையும் எடுக்க கூடாது என உத்தரவிட்டு வழக்கை ஒத்திவைத்தார்.

இதையும் படிங்க: போலி வீடியோ விவகாரத்தில் பாஜக பிரமுகருக்கு முன் ஜாமின் வழங்க மறுப்பு!