தற்கொலைக்கு முயன்றவரை சமரசம் செய்த திமுக எம்எல்ஏ!

சென்னை: மன உளைச்சலில் செல்ஃபோன் டவர் மீது ஏறி தற்கொலைக்கு முயன்ற இளைஞரை திமுக எம்எல்ஏ சேகர்பாபு நேரில் சென்று சமாதானம் செய்தார்.

சென்னை அன்னை சத்யா நகர் பகுதியைச் சேர்ந்தவர் மாறன் வயது (32). கட்டடத் தொழிலாளியான இவருக்கு திருமணமாகி மனைவி, இரண்டு பெண் குழந்தைகள் உள்ளனர். இந்நிலையில் இவர் அடிக்கடி மது அருந்திவிட்டு போதையில் மனைவியுடன் சண்டையிட்டு வந்துள்ளார். இதனால் அவரது மனைவி இவரை விட்டு தனியாக பிரிந்து வாழ்ந்து வந்துள்ளார்.

இதனால் மன உளைச்சலுக்கு ஆளான அவர், நேற்று இரவு அதேபகுதியில் உள்ள செல்ஃபோன் டவர் மீது ஏறி தற்கொலை முயற்சியில் ஈடுபட்டுள்ளார். இதையடுத்து தகவலறிந்து வந்த காவல்துறையினர், தீயணைப்பு வீரர்கள் ஆகியோருடன் இணைந்து அவரை மீட்கும் பணியில் ஈடுபட்டனர். ஆனால் அவர் கிழே இறங்கவில்லை. அப்போது அந்த வழியே வந்த துறைமுகம் தொகுதி திமுக எம்எல்ஏ சேகர்பாபு, மாறன், அவரது குடும்பத்தினரிடம் சமரசம் பேசியதைத் தொடர்ந்து அவர் தற்கொலை முயற்சியை கைவிட்டார்.