சென்னையில் எம்ஜிஆர் சிலை மீது பெயிண்ட் ஊற்றி தப்பிய நபரை ஒரு மணி நேரத்தில் பிடித்த போலீஸ்

வண்ணாரப்பேட்டையில் எம்.ஜி.ஆர் சிலை மீது பெயிண்டை ஊற்றிய நபரை போலீசார் ஒரு மணி நேரத்தில் கைது செய்து விசாரணை நடத்தி வருகின்றனர்.

சென்னை: வண்ணாரப்பேட்டை காளிங்கராயன் தெருவில் மார்பளவு கொண்ட எம்.ஜி.ஆர் சிலை அமைந்துள்ளது. இந்த சிலையின் மீது நேற்றிரவு அடையாளம் தெரியாத நபர் ஒருவர் சிவப்பு நிற பெயிண்டை ஊற்றி சென்றதால் பரபரப்பு ஏற்பட்டது. இந்தச் சம்பவம் தொடர்பாக, அங்குள்ள பொதுமக்கள் வண்ணாரப்பேட்டை காவல்துறைக்கு புகார் அளித்தனர். மேலும் அதிமுக தொண்டர்கள் சம்பவ இடத்தில் ஒன்று கூடியதால், அந்தப் பகுதியில் பரபரப்பு ஏற்பட்டது.

இதனையடுத்து போலீசார் சம்பவ இடத்திலிருந்த சிசிடிவி காட்சிகளை ஆய்வு செய்தபோது, ஒரு நபர் எம்.ஜி.ஆர் சிலை மீது சிவப்பு பெயிண்ட் ஊற்றியதும், முக அடையாளங்களை வைத்து பழைய வண்ணாரப்பேட்டை பகுதியை சேர்ந்த லியோநார்ட்(43) என்பவரை கைது செய்தனர். கைது செய்யப்பட்ட லியோநார்ட் என்பவரிடம் நடத்திய விசாரணையில், அவர் சற்று மனநலம் பாதிக்கப்பட்டவர் என்பதும், சைதாப்பேட்டையில் உள்ள தனியார் மருத்துவமனையில் சிகிச்சைப் பெற்று வருவதும் தெரிய வந்தது.

இதையும் படிங்க: கத்தியை காட்டி ஆபாச வீடியோ எடுத்து மிரட்டல்.. 'டேட்டிங் ஆப்' மூலம் மோசடி செய்த கும்பல் கைது!

இதையடுத்து அவர் மீது எந்தவொரு வகுப்பினரின் மதத்தையும் அவமதிக்கும் நோக்கத்துடன் செயல்படுதல், கலகம் செய்யத் தூண்டிவிடுதல், எந்தவொரு வழிப்பாட்டுத் தலத்திலோ அல்லது சமய வழிபாடுகள் மீது குற்றத்தில் ஈடுபடுதல் உள்ளிட்ட மூன்று இடங்களில் போலீசார் வழக்குப்பதிவு செய்தனர்.

இது தொடர்பாக செய்தியாளர்களைச் சந்தித்த சென்னை காவல்துறையின் தலைமையிட கூடுதல் ஆணையர் லோகநாதன், ''எம்.ஜி.ஆர் சிலை மீது பெயிண்ட் ஊற்றிய நபரை புகார் அளித்த 1 மணி நேரத்தில் கைது செய்துள்ளோம். கைது செய்யப்பட்ட நபர் எந்தவொரு அரசியல் கட்சியையும் சாராதவர்” எனத் தெரிவித்தார். மேலும் அவரிடம் தீவிர விசாரணை மேற்கொண்டு வருவதாக அவர் கூறினார்.

இதையும் படிங்க: தியேட்டருக்கு வெளியே தொழிலதிபர் கார் மீது தாக்குதல்.. சென்னை நடந்தது என்ன?