கரோனா தொற்றால் சாதாரண பொதுமக்கள் மட்டுமில்லாமல், அதனைத் தடுக்கும் பணியில் ஈடுபட்டிருக்கும் காவல் துறையினர், மருத்துவர்கள், செவிலியர் தூய்மைப் பணியாளர்கள் உள்ளிட்ட களப்பணியாளர்களும் பெரிதும் பாதிக்கப்படுகின்றனர்.
குறிப்பாக, சென்னையில் மட்டும் 100க்கும் மேற்பட்ட காவலர்கள் கரோனா தொற்றால் பாதிக்கப்பட்டுள்ளனர். இச்சூழலில் சென்னை காவல் துறையில் முதல் உயிரிழப்பு ஏற்பட்டுள்ளது காவல் துறை தரப்பில் கலக்கத்தை உண்டாக்கியுள்ளது.
சென்னை மாம்பலம் காவல் நிலையத்தில் சட்டம்-ஒழுங்கு காவல் ஆய்வாளராகப் பணியாற்றிவந்தவர் பாலமுரளி (47). கரோனா தடுப்புப் பணியில் ஈடுபட்டிருந்த இவர் பல்வேறு விழிப்புணர்வு நிகழ்ச்சிகளிலும் கலந்துகொண்டுள்ளார். இச்சூழலில் இவர் கடந்த ஜூன் 5ஆம் தேதி கரோனா தொற்றால் பாதிப்புக்குள்ளானார்.
காய்ச்சல் தொடர்ந்து அதிகரித்துக் கொண்டே சென்றதால் ஜூன் 7ஆம் தேதி ராஜீவ்காந்தி அரசுப் பொது மருத்துவமனையில் அனுமதிக்கப்பட்டு, சிகிச்சை பெற்றுவந்தார். அவரின் உடல்நிலையில் எந்த முன்னேற்றமும் காணப்படாத நிலையில், சிகிச்சை பலனின்றி நேற்று மாலை உயிரிழந்தார். சென்னை காவல் துறையில் கரோனாவால் ஏற்பட்ட முதல் உயிரிழப்பு இதுவாகும்.