ஒரு கோடி பயனாளர்களை நெருங்கும் மக்களைத் தேடி மருத்துவம் திட்டம் - மா.சுப்பிரமணியன்

மக்களைத் தேடி மருத்துவம் திட்டத்தில் பயன் பெறும், கோடியாவது நபருக்கு முதலமைச்சரே நேரில் சென்று மருந்து பெட்டகத்தை வழங்குவார் என அமைச்சர் மா.சுப்பிரமணியன் தெரிவித்துள்ளார்.

சென்னை: சர்வதேச மாற்றுத்திறனாளிகள் தினத்தை முன்னிட்டு சென்னை கிண்டியில் உள்ள தனியார் நட்சத்திர விடுதியில் நடைபெற்ற நிகழ்ச்சியில் மக்கள் நல்வாழ்வுத்துறை அமைச்சர் மா.சுப்பிரமணியன் மாற்றுத்திறனாளிகளுக்கு பணி நியமன ஆணைகளை வழங்கினார்.

மத்திய அரசின் மாற்றுத்திறனாளிகளுக்கான தேசிய வாழ்வாதார சேவை மையம் (NCSC-DA) மற்றும் ஐ.டி.சி. கிராண்ட் சோலா இணைந்து சர்வதேச மாற்றுத்திறனாளிகள் தின நிகழ்ச்சியை நடத்தியது. இந்த நிகழ்ச்சியில் பங்கேற்ற அமைச்சர் மா.சுப்பிரமணியன் NCSC-DA நடத்திய வேலை வாய்ப்பு முகாமில் தேர்வான மாற்றுத்திறனாளிகள் 15 பேருக்கு பணி நியமன ஆணைகளை வழங்கினார்.

பின்னர் செய்தியாளர்களை சந்தித்த அமைச்சர் மா.சுப்பிரமணியம், "உலக மாற்றுத்திறனாளிகள் தினைத்தையொட்டி பல்வேறு நிகழ்ச்சிகள் இன்று நடைபெற்று வருகிறது. முதலமைச்சர் தலைமையில் காலை நிகழ்ச்சி நடைபெற்றது. 15 மாற்றுத்திறனாளிகளுக்கு ஐ.டி.சி நிறுவனம் வேலைவாய்ப்பினை வழங்கியுள்ளது.

இது போல் மற்ற தனியார் நிறுவனங்களும் மாற்றுத்திறனாளிகளுக்கு வேலை வாய்ப்பினை கொடுத்தால் மாற்றுத்திறனாளிகளுக்கு வேலை இல்லை என்ற நிலை இருக்காது. இதற்காக அரசும் வேலை செய்கிறது, தனியார் நிறுவனங்களும் செய்ய வேண்டும். அரசு மருத்துவர்களுக்கு உயர் சிறப்பு பட்ட மேற்படிப்புக்காக (சூப்பர் ஸ்பெஷாலிட்டி படிப்பு) 50% இட ஒதுக்கீட்டு மூலம் மாநில அரசே நிரப்பிக்கொள்ளலாம் என்ற தீர்ப்பு வந்துள்ளது. இது அரசு மருத்துவர்களிடையே மகிழ்ச்சியை ஏற்படுத்தி உள்ளது. சூப்பர் ஸ்பெஷாலிடி படிப்பில் 100% இட ஒதுக்கீட்டையும், ஒன்றிய அரசே நிரப்பும் என்ற தீர்ப்புக்கு எதிரான மேல் முறையீட்டு வழக்கில் மாநில அரசுக்கான உரிமை உறுதிபடுத்தப்பட்டு உள்ளது.

சென்னை எம்.ஜி.ஆர் நகரில் மாற்றுத்திறனாளிகளுக்கு பிரத்தேகமாக செயற்கை கை, கால்கள் உள்ளிட்டவற்றை தயாரிக்கும் கட்டிடம் 39 கோடி செலவில் கட்டப்பட்டு வருகிறது. இதன் கட்டுமான பணிகள் 15 நாட்காளில் முடியும் நிலையில் உள்ளது. இதை முதலமைச்சர் திறந்து வைக்க உள்ளார்.

முதலமைச்சர் காப்பீட்டு திட்டத்தில் 5 லட்சம் என்ற உயர்த்தப்பட்ட தொகை மூலம், மக்கள் பயன் பெற்று வருகிறார்கள். இதில் உறுப்பு மாற்று அறுவை சிகிச்சை, எலும்பு மாற்று, இருதயம் மாற்று அறுவை சிகிச்சை உள்ளிட்டவற்றிற்கு 22 லட்சம் ரூபாய் வரை பயன்பெறுகிறார்கள். மருத்துவ காப்பீட்டு திட்டம் மூலம் 1 கோடியே 58 லட்சம் பயனாளிகள் பயன் பெற்று உள்ளனர்.

ஒப்பந்த பணியாளர்கள் விவகாரத்தை பொறுத்தவரை, ஒப்பந்த பணியார்களை கடந்த ஆட்சியில் இஷ்டத்திற்கு எடுத்து விட்டார்கள் இட ஒதுக்கீடு எதையும் பின்பற்றவில்லை. அவர்களை, இருக்கும் வரை பணியில் பயன்படுத்துவோம், எம்.ஆர்.பி மூலம் அவர்கள் பணியில் சேரலாம்.

மக்களை தேடி மருத்துவம் திட்டத்தின் மூலம் இன்று காலை வரை பயனடைந்தோர் எண்ணிக்கை 98 லட்சத்து 38 ஆயிரம். இன்னும் 10 நாட்களில் ஒரு கோடி பயனாளிகள் என்ற நிலை ஏற்படும். ஒரு கோடியாவது பயனாளி எங்கு இருந்தாலும் அவர்களுக்கு தமிழ்நாடு முதலமைச்சர் நேரடியாக சென்று மருந்து பெட்டகத்தை வழங்குவார்கள்.

இன்னுயிர் காப்போம் திட்டத்தில் 232 அரசு மருத்துவமனைகள், 447 தனியார் மருத்துவமனைகள் என மொத்தம் 679 மருத்துவமனைகளில் திட்டம் செயல்படுத்தப்பட்டு வருகிறது. இதுவரை கடந்த 11 மாதத்தில் 116 கோடியே 3 லட்சம் மதிப்பில், 1 லட்சத்து 17 ஆயிரத்து 974 பேர் பயன்பெற்றுள்ளார்கள். பொதுசுகாதாரத்துறை மாநாட்டில் 2,500 பேர் கலந்து கொள்ள உள்ளார்கள். பொதுசுகாதாரத்துறை மாநாடு, வரும் 5ஆம் தேதி துவங்கி 8ஆம் தேதி நிறைவு பெறுகிறது" என தெரிவித்தார்.

இதையும் படிங்க:மாற்றுத்திறனாளிகளுக்கான ஓய்வூதியம் 1,500 ரூபாயாக உயர்வு- முதலமைச்சர் அறிவிப்பு