ஜெனரேட்டரில் மோதிய சட்டக்கல்லூரி மாணவர் உயிரிழப்பு

சென்னை கோடம்பாக்கத்தில் பைக்கில் சென்ற சட்டக்கல்லூரி மாணவர், தனியார் வங்கியின் ஜெனரேட்டர் மீது மோதியதில் உயிரிழந்துள்ளார்.

சென்னை: கோடம்பாக்கம் பாலம் அருகே நேற்றிரவு (ஜன.22) அதிவேகமாக வந்த பைக் ஒன்று, திடீரென கட்டுப்பாட்டை இழந்தது. இதனால் அங்கிருந்த வங்கி வளாகத்தில் புகுந்த பைக், ஜெனரேட்டரில் வேகமாக மோதியது. இந்த வாகனத்தை ஓட்டி வந்த இளைஞர் தூக்கி வீசப்பட்டு, சம்பவ இடத்திலேயே உயிரிழந்தார்.

இதுகுறித்து தகவல் அறிந்த பாண்டிபஜார் போக்குவரத்து புலனாய்வு பிரிவு காவல் துறையினர், சம்பவ இடத்திற்கு வந்து, உயிரிழந்த இளைஞரின் உடலை மீட்டு, பிரேத பரிசோதனைக்காக கீழ்பாக்கம் அரசு மருத்துவமனைக்கு அனுப்பி வைத்தனர். விபத்து குறித்து வழக்குப்பதிவு செய்த காவல் துறையினர் விசாரணை மேற்கொண்டனர்.

முதல்கட்ட தகவலில் விபத்தில் உயிரிழந்த இளைஞர் சூளைமேடைச் சேர்ந்த விக்னேஷ் (22) என்பது தெரிய வந்தது. இவர் மதுரவாயலில் உள்ள தனியார் கல்லூரியில் 2ஆம் ஆண்டு சட்டப்படிப்பு படித்து வந்துள்ளார். இந்த நிலையில் நேற்றிரவு வடபழனியில் இருந்து சூளைமேடு நோக்கி பைக்கில் வந்தபோது விபத்தில் சிக்கி உயிரிழந்தது தெரிய வந்தது. இதனையடுத்து சம்பவ இடத்தில் உள்ள சிசிடிவி காட்சிகளை காவல் துறையினர் ஆய்வு செய்து வருகின்றனர்.

இதையும் படிங்க:குழந்தைகளோடு மனைவியை கொன்று புதைத்த ரயில்வே ஊழியர்