'எதிர்க்கட்சிகளால் தான் தமிழ்நாடு அரசு வேகமாக இயங்கிக் கொண்டிருக்கிறது' - ஈஸ்வரன்!

சென்னை: உள்ளாட்சித் தேர்தல் தொடர்பாக திமுக தலைவர் ஸ்டாலினை கொங்கு நாடு மக்கள் தேசிய கட்சி பொதுச்செயலாளர் ஈஸ்வரன் சந்தித்தார்.

சென்னை அண்ணா அறிவாலயத்தில் திமுக தலைவர் ஸ்டாலினை கொங்குநாடு மக்கள் தேசிய கட்சி பொதுச்செயலாளர் ஈஸ்வரன் சந்தித்துப் பேசினார். அப்போது திமுக பொருளாளர் துரைமுருகன், எம்.எல்.ஏ எ.வ.வேலு, துணை பொதுச்செயலாளர் ஐ.பெரியசாமி ஆகியோர் உடனிருந்தனர்.

பின்னர் ஈஸ்வரன் செய்தியாளர்களிடம் பேசுகையில், 'உள்ளாட்சித் தேர்தல் தொடர்பாக திமுக தலைவர் ஸ்டாலினைச் சந்தித்து பேசினேன். எப்போது தேர்தல் வந்தாலும் நாங்கள் சந்திப்பதற்கு தயாராக இருக்கின்றோம். ஆனால் தமிழ்நாடு தேர்தல் ஆணையம் எந்தவிதமான நடைமுறையையும் பின்பற்றாமல் தேர்தல் அறிவிப்புகளை வெளியிட்டுள்ளது.

இத்தனை நாட்களாக என்ன வழக்கினால் உள்ளாட்சித் தேர்தல் நடத்தப்படாமல் இருந்ததோ, அந்த வழக்கில் கேட்கப்பட்ட ஏதும் இதுவரை தேர்தல் ஆணையம் வரையறை செய்யவில்லை. உள்ளாட்சித் தேர்தலை பிரித்து நடத்தியதாக வரலாறே கிடையாது. ஊரகப் பகுதிகளுக்கு ஒரு தேதியிலும், பேரூராட்சி, நகர, மாநகராட்சி பகுதிகளுக்கு இன்னொரு தேதியிலும் நடத்தினால், இந்தத் தேர்தலின் தாக்கம் அடுத்தத் தேர்தலிலும் இருக்கும்.

இந்தத் தேர்தலை நடத்தக் கூடாது என்ற முடிவில் எந்த நடைமுறையையும் பின்பற்றாமல் உள்ளாட்சித் தேர்தலை அறிவித்திருக்கிறார்கள். அதையும் கடந்து தேர்தல் நடத்தப்படும் என்று சொன்னால், அதைச் சந்திப்பதற்கு எப்போதும் நாங்கள் தயாராக இருக்கிறோம்' என்றார்.

தொடர்ந்து, 'மேட்டுப்பாளையத்தில் தீண்டாமைச் சுவர் இடிந்து விழுந்து 17 பேர் இறந்த சம்பவம் தமிழ்நாடு முழுவதும் பெரும் வேதனையை ஏற்படுத்தியிருக்கிறது. திமுக தலைவர் ஸ்டாலின் தமிழ்நாட்டில் எங்கு என்ன நடந்தாலும் உடனடியாக அந்த இடத்திற்குச் சென்று பாதிக்கப்பட்டவர்களுக்கு ஆறுதல் சொல்லி வந்துகொண்டிருக்கிறார். எதிர்க்கட்சித் தலைவரால் தான் தமிழ்நாடு அரசு வேகமாக இயங்கிக் கொண்டிருக்கிறது' என்றார்.

இதையும் படிங்க: அரசின் அலட்சியத்தால் 17 பேர் உயிரிழப்பு - ஸ்டாலின்!