சட்டத்துறையில் புதிய அறிவிப்புகளை வெளியிட்ட அமைச்சர் ரகுபதி; முழு விவரம்!

சட்டத்துறை அமைச்சர் ரகுபதி தமிழக சட்டப் பேரவையில் நேற்று சட்டத்துறைக்கு பல முக்கிய அறிவிப்புகளை வெளியிட்டார்.

சென்னை: தமிழக சட்டப்பேரவையில் நேற்று நீதி நிர்வாகம் மானியக்கோரிக்கை மீதான விவாதத்தில் உறுப்பினர்கள் பேசினர். அதற்கு சட்டத்துறை அமைச்சர் ரகுபதி பதிலளித்தார். பின்னர் அவர் நீதி நிர்வாகத்திற்கு புதிய அறிவிப்புகளை வெளியிட்டார். அவற்றின் விவரம் பின் வருமாரு,

1. திருநெல்வேலி மாவட்டத்தில், குழந்தைகளை பாலியல் குற்றங்களில் இருந்து பாதுகாக்கும் சட்டம் 2012 கீழ் ஏற்படும் வழக்குகளை விசாரிப்பதற்காக திருநெல்வேலியில் கூடுதலாக ஒரு சிறப்பு நீதிமன்றம் அமைக்கப்படும்.

2. திருவண்ணாமலை மாவட்டம், செய்யாறில் 12 புதிய பணியிடங்கள் மற்றும் அனைத்து உட்கட்டமைப்பு வசதிகளுடன் கூடிய ஒரு கூடுதல் சார்பு நீதிமன்றம் அமைக்கப்படும்.

3. விழுப்புரம் மாவட்டம், வானூரில் தற்போது இயங்கி வரும் மாவட்ட உரிமை இயல் மற்றும் குற்றவியல் நடுவர் நீதிமன்றத்தை பிரித்து தனியாக ஒரு மாவட்ட உரிமை இயல் நீதிமன்றமும் ஒரு குற்றவியல் நடுவர் நீதிமன்றமும் அமைக்கப்படும்.

4. வேலூர் மாவட்டம், அரக்கோணத்தில் அனைத்து உட்கட்டமைப்பு வசதிகளுடன் கூடிய ஒரு குற்றவியல் நீதிமன்றம் அமைக்கப்படும்.

5. காஞ்சிபுரம் மாவட்டம், செங்கல்பட்டு ஒருங்கிணைந்த நீதிமன்ற வளாகத்தில் உள்ள மாவட்ட சட்டப்பணிகள் ஆணைக்குழு கட்டடத்தின் முதல் தளத்தை புதுப்பித்து வணிக நீதிமன்றங்கள் செயல்பட இடம் அளிக்கப்படும்.

6. சேலம் மாவட்டம் மேட்டூர், நாமக்கல் மாவட்டம் ராசிபுரம் மற்றும் திருச்செங்கோடு, தஞ்சாவூர் மாவட்டம் பட்டுக்கோட்டை மற்றும் திருவையாறு ஆகிய இடங்களில் உள்ள ஒருங்கிணைந்த நீதிமன்ற கட்டிடங்களில் ரூ.1,66,90,112 செலவினத்தில் மின் தூக்கி வசதி ஏற்படுத்தப்படும்.

7. திருப்பூர் மாவட்டம், தாராபுரத்தில் உள்ள கூடுதல் மாவட்ட மற்றும் அமர்வு நீதிமன்ற கட்டடத்திற்கு மாற்று திறனாளிகள் பயன்படுத்தக்கூடிய வகையிலான மின்தூக்கி வசதி ரூ.44,06,000 செலவினத்தில் கட்டமைக்கப்படும்.

8. நீதிபதிகளின் பயன்பாட்டிற்கான 718 மடிக்கணினிகள் மற்றும் அச்சுப்பொறிகள் ரூ.10,71,55,047 செலவீனத்தில் புதிதாக வாங்கப்படும்.

10. சென்னை உயர்நீதிமன்ற மதுரை கிளையின் பயன்பாட்டிற்கு தற்போது உள்ள கியோஸ்க் கருவிகளுக்கு பதிலாக 11 புதிய தொடுதிரை கியோஸ்க் கருவிகள் ரூ.23,07,658 செலவினத்தில் வாங்கப்படும்.

11. புதிதாக உருவாக்கப்பட்டுள்ள கிருஷ்ணகிரி மற்றும் திருப்பூர் மாவட்டங்களில் தலா ஓர் உதவி இயக்குநர் மற்றும் உரிய தேவையான பணியிடங்கள் இதர வசதிகளுடன் கூடிய குற்ற வழக்கு தொடர்வுத் துறை உதவி இயக்குனர் அலுவலகங்கள் தோற்றுவிக்கப்படும்.

12. குற்ற வழக்கு விசாரணைகளை திறம்பட நடத்தி பாதிக்கப்பட்டவர்கள் மற்றும் வழக்கு தொடுப்பவர்களுக்கு நீதி கிடைக்க வழிவகை செய்யும் பொருட்கள் இணையவழி அணுகல், தரவு மற்றும் குரல் வசதி ஆகியவற்றை குற்ற வழக்கு தொடர்வு துறைக்கு ரூ.20,28,000 செலவீனமாக வழங்கப்படும்.

13. மாநிலத்தில் உள்ள 18 சார்நிலை நீதிமன்றங்களுக்கு கணினி மற்றும் உபகரணங்கள் ரூபாய் 80 கோடி செலவீனத்தில் வாங்க 2023-2024 மற்றும் 2024-2025 ஆகிய நிதி ஆண்டுகளில் இரண்டு கட்டங்களாக நிதி ஒப்புதல் வழங்கப்படும்.

14. குற்ற வழக்குத் தொடர்வு இயக்கத்தின் பயன்பாட்டிற்கு தற்போது பயன்பாட்டில் உள்ள 10 மேசை கருவிகளுக்கு பதிலாக புதிதாக 10 மேசை கணினிகளும் மற்றும் ஐந்து அச்சுப்பொறிகள் ரூ.12,95,000 செலவினத்தில் வழங்கப்படும்.

15. குற்ற வழக்கு தொடர்வு இயக்கத்தின் சார்நிலை அலுவலகங்களின் பயன்பாட்டிற்காக தற்போது பயன்பாட்டில் உள்ள மேசை கணினி மற்றும் அச்சுப்பொருட்களுக்கு பதிலாக புதியதாக 28 மேசை கணினிகளும் மற்றும் 28 அச்சுப்பொறிகளும் ரூ.46,76,000 செலவினத்தில் வாங்கப்படும்.

இதையும் படிங்க:தமிழ் வளர்ச்சி மற்றும் செய்தித் துறைக்கான புதிய 18 அறிவிப்புகள் வெளியீடு!