தாம்பரத்தில் தலைமறைவான நகைக்கடை உரிமையாளர்

சென்னை: தாம்பரம் அருகே நகைக் கடை உரிமையாளர் திடீரென குடும்பத்துடன் தலைமறைவானதையடுத்து, அவர் கோடிக் கணக்கில் மோசடியில் ஈடுபட்டுள்ளதாக வாடிக்கையாளர் புகாரளித்துள்ளார்.

சென்னை, தாம்பரம் அடுத்த கௌரிவாக்கம் பகுதியைச் சேர்ந்தவர் வெங்கடேசன்(38). இவர், வேளச்சேரி பிராதன சாலையில் இருசக்கர வாகனம் பழுது பார்க்கும் கடை நடத்தி வருகிறார். அதே பகுதியில் நகைக்கடை நடத்தி வருபவர் பிரகாஷ்(40). இவரது கடையில் 18 சவரன் தங்க நகைகளை வெங்கடேசன் அடமானம் வைத்துள்ளார். மேலும், சிட்பண்ட் மூலம் இரண்டு லட்ச ரூபாய் பணத்தையும் செலுத்தியுள்ளார்.

இதையடுத்து வெகு நாள்களாக செலுத்தப்பட்ட பணத்திற்கு நகை வழங்காததால் தான் கட்டிய பணத்தை பிரகாஷிடம் கேட்டதையடுத்து இரண்டு லட்ச ரூபாய்க்கான போலி காசோலையை வழங்கியுள்ளார். மேலும், ஊரடங்கில் தளர்வுகள் அறிவிக்கப்பட்டு ஒரு மாத காலமாக நகைக்கடை மூடப்பட்டிருந்ததால் சந்தேகம் அடைந்த வெங்கடேசன், அக்கம் பக்கத்தினரை விசாரித்த போது நகை மற்றும் பணத்துடன் உரிமையாளர் பிரகாஷ் குடும்பத்தினருடன் தலைமறையாகி விட்டது தெரியவந்தது.

பின்னர் அருகாமையிலேயே மற்றோரு நகைக் கடை நடத்தி வந்த அவரது சகோதரரை விசாரித்த போது தனக்கு ஒன்றும் தெரியாது என்று கூறியுள்ளார். மேலும், நகைக் கடை உரிமையாளர் பிரகாஷ் இது போல் பலரை ஏமாற்றி நகை, பணத்தை எடுத்துச் சென்று தலைமறைவானதாக பலர் சேலையூர் காவல் நிலையத்தில் புகார் அளித்திருப்பது தெரியவந்துள்ளது.

இவர், கோடிக்கணக்கில் நகை மற்றும் பணம் மோசடியில் ஈடுபட்டிருக்கலாம் என்றும், உடனடியாக காவல் துறையினர் உரிய நடவடிக்கை மேற்கொண்டு தங்களின் நகை மற்றும் பணத்தை மீட்டுத் தருமாறும் அவர் காவல் நிலையத்தில் புகாரளித்துள்ளார்.