வட மாநில மாணவர்களால் கல்வி நிறுவனங்களில் கரோனா அதிகரிப்பு- மா. சுப்பிரமணியன்

வட மாநிலங்களில் இருந்து தமிழ்நாட்டிற்கு படிக்க வரும் மாணவர்களாலே கரோனா நோய்த்தொற்று அதிகரிப்பதாக அமைச்சர் மா.சுப்பிரமணியன் தெரிவித்துள்ளார்.

சென்னை:பொது சுகாதாரம் மற்றும் நோய்த் தடுப்பு மருந்துத்துறை சார்பில் யானைக்கால் நோயாளிகளுக்கான உதவித்தொகை வழங்கும் நிகழ்ச்சி, சென்னை தேனாம்பேட்டையில் உள்ள டிஎம்எஸ் வளாகத்தில் இன்று (ஜூன் 1) நடைபெற்றது.

இந்நிகழ்ச்சியில் மருத்துவம் மற்றும் மக்கள் நல்வாழ்வுத் துறை அமைச்சர் மா.சுப்பிரமணியன் கலந்து கொண்டு, யானைக்கால் நோயால் பாதிக்கப்பட்டவர்களுக்கு உதவித்தொகைக்கான சான்றிதழ் மற்றும் நலத்திட்ட உதவிகளை வழங்கினார்.

மேலும், மருத்துவத்துறையில் பணியாற்றி பணியின் போது உயிரிழந்த வாரிசுகள் 20 பேருக்கு கருணை அடிப்படையிலான பணி ஆணையை வழங்கினார். இதனைத் தொடர்ந்து செய்தியாளர்களைச் சந்தித்த அமைச்சர் மா.சுப்பிரமணியன், "தமிழ்நாட்டில் யானைக்கால் நோயால் பாதிக்கப்பட்டு அன்றாட பணிகளை செய்ய முடியாமல் நான்காம் நிலையில் இருக்கும் 8,023 பேருக்கு உதவித்தொகை மாதந்தோறும் வழங்கப்படுகிறது.

யானைக்கால் நோய் விழிப்புணர்வு: இதற்காக மக்கள் நல்வாழ்வுத் துறை சார்பில் மாதந்தோறும் ரூ.9,62,76,000 செலவிடப்படுகிறது. இந்த திட்டம் கடந்த 2010 ஆம் ஆண்டு தொடங்கி 12 ஆண்டுகள் தொடர்ந்து நடைபெற்று வருகிறது. யானைக்கால் நோயால் பாதிக்கப்பட்டவர்கள் பொட்டாசியம் பெர்மாங்கனேட் கொண்டு தண்ணீரில் கலந்து தினசரி சுத்தம் செய்யவேண்டும். அப்படி செய்தால், குணமடைய வாய்ப்பு இருக்கிறது. யானைக்கால் நோய் தொற்று இல்லை.

யானைக்கால் நோயால் பாதிக்கப்பட்டவர்களை கடித்த கொசு மற்றவர்களை கடித்தால் நோய் பரவும். இதுகுறித்து பெரிய அளவில் விழிப்புணர்வு ஏற்படுத்த வேண்டும். சுகாதார அலுவலர்கள், யானைக்கால் நோயால் பாதிக்கப்பட்டவர்களை தொடர்ந்து கண்காணிப்பார்கள். அதற்கேற்றார்போல் அவர்களுக்கு சிகிச்சைகள் அளிக்கப்படும்.

யானைக்கால் நோயால் பாதிக்கப்பட்டு கால் பெரியதாக இருப்பவர்களுக்கு, முதற்கட்டமாக 2 பேருக்கு தசை குறைப்பு அறுவை சிகிச்சை செய்வோம். அது வெற்றி பெற்றபிறகு, மீதமுள்ள 8,000 பேருக்கு தமிழ்நாடு அரசு சார்பில் காப்பீடு திட்டம் மூலம் இலவசமாக, தசை அறுவை சிகிச்சை செய்ய ஏற்பாடு செய்யப்படும்.

கரோனா அதிகரிப்பு: தமிழ்நாட்டில் கரோனா தொற்று எண்ணிக்கை 100 க்கு கீழே இருக்கிறது. அதிலும் இறப்பு விகிதம் இன்றி தொடர்கிறது. டெல்லி, ஹரியானா, உத்தரப் பிரதேசம், மகாராஷ்டிரா, மத்தியப்பிரதேசம், கேரளா போன்ற பல்வேறு மாநிலங்களில் தொற்று எண்ணிக்கை அதிகரித்து வருகிறது.

வடமாநிலங்களில் இருந்து தமிழ்நாட்டில் உள்ள கல்வி நிறுவனங்களுக்கு படிப்பதற்கு வரும் மாணவர்களால் நோய் தொற்று அதிகரிக்கிறது. கல்லூரிகளில் மாணவர்கள் சமூக இடைவெளியை கடைபிடித்து, முக கவசம் அணியவும் கல்வி நிறுவனங்களுக்கு அறிவுறுத்தியுள்ளோம்.

அண்ணா பல்கலைக்கழகத்தில் 23 பேருக்கு தொற்று இருப்பது கண்டறியப்பட்டது. ஐஐடி, சத்திய சாய் பயிற்சி வளாகத்தில் தற்போது யாருக்கும் தொற்று இல்லை.118 விஐடி மாணவர்களுக்கு தொற்று ஏற்பட்டுள்ளது. இன்று 45 பேருக்கு தொற்று ஏற்பட்டுள்ளது. மொத்தம் 163 பேருக்கு தொற்று ஏற்பட்டுள்ளது. விஐடியில் 5,600 மாணவர்களுக்கும், 1500 ஊழியர்களுக்கும் தொற்று பரிசோதனை செய்ய வேண்டும்.

அண்ணா பல்கலைக்கழகம், சத்யசாய், ஐஐடி ஆகிய இடங்களில் சோதனை செய்யப்பட்டதில் பிஏ 2 வகை தான் இருக்கிறது. ஒருவருக்கு மட்டும் தான் பிஏ3 என கண்டறியப்பட்டது. அதுவும் அவர்களுக்கு குணமடைந்து விட்டது. இந்தியாவில், பல்வேறு மாநிலங்களில் தொற்று எண்ணிக்கை தினசரி 1,000 மற்றும் 5,000 ஐ கடந்தும் காணப்படுகிறது.

தடுப்பூசி செலுத்திக் கொண்டவர்கள் உலகம் முழுவதும் பாதுகாப்பாக இருக்கிறார்கள். தமிழ்நாடு முழுவதும் வருகிற 12 ஆம் தேதி ஒரு லட்சம் இடங்களில் மெகா தடுப்பூசி முகாம் நடைபெறும்" எனத் தெரிவித்தார்.

இதையும் படிங்க:குரங்கு அம்மை பரவலை தடுக்க விமான நிலையங்களில் தீவிர கண்காணிப்பு!