அகில இந்திய ஒதுக்கீடு இடங்கள்...மாநில இடஒதுக்கீடு எப்படி பொருந்தும் - உயர் நீதிமன்றம் கேள்வி

அகில இந்திய ஒதுக்கீட்டு இடங்களை ஒன்றிய அரசுக்கு ஒதுக்கிய பின் தமிழ்நாடு இட ஒதுக்கீடு அதற்கு எப்படி பொருந்தும்? என கேள்வி எழுப்பிய சென்னை உயர் நீதிமன்றம், அந்த இடங்கள் திரும்ப வழங்கப்பட்டால் மட்டுமே தமிழ்நாடு அரசின் இட ஒதுக்கீட்டை பின்பற்ற முடியும் என தெரிவித்துள்ளது.

சென்னை:மருத்துவ படிப்புகளில் அகில இந்திய ஒதுக்கீடு இடங்களில், இதர பிற்படுத்தப்பட்ட வகுப்பினருக்கான இட ஒதுக்கீட்டை பின்பற்றுவது தொடர்பாக குழு அமைத்து முடிவெடுக்க வேண்டும் என ஒன்றிய அரசுக்கு, சென்னை உயர் நீதிமன்றம் கடந்த 2020ஆம் ஆண்டு ஜூலையில் உத்தரவிட்டது.

இந்த உத்தரவை அமல்படுத்த நடவடிக்கை எடுக்கவில்லை எனக் கூறி திமுக தரப்பில் தாக்கல் செய்யப்பட்ட நீதிமன்ற அவமதிப்பு வழக்கு, தலைமை நீதிபதி சஞ்ஜீப் பானர்ஜி தலைமையிலான அமர்வில் விசாரணைக்கு வந்தது.

திமுக தரப்பு வாதம்

அப்போது, திமுக சார்பில் ஆஜரான மூத்த வழக்கறிஞர் வில்சன், அகில இந்திய ஒதுக்கீட்டு இடங்களுக்கு 27 விழுக்காடு இட ஒதுக்கீடு வழங்குவதாக ஒன்றிய அரசு தெரிவித்துள்ளதாகவும், இந்த இட ஒதுக்கீடு என்பது ஒன்றிய அரசு கல்வி நிறுவனங்களுக்கு மட்டுமே பொருந்தும் எனவும் தமிழ்நாடு கல்லூரிகளுக்கு பொருந்தாது எனவும் வாதிட்டார்.

அப்போது, அகில இந்திய ஒதுக்கீட்டு இடங்களை ஒன்றிய அரசுக்கு ஒதுக்கிய பின் தமிழ்நாடு இட ஒதுக்கீடு அதற்கு எப்படி பொருந்தும்? என கேள்வி எழுப்பிய நீதிபதிகள், ஒன்றிய அரசுதான் இதுகுறித்து முடிவு செய்ய முடியும். தமிழ்நாடு இட ஒதுக்கீட்டை அமல்படுத்த கூற முடியாது எனவும், அந்த இடங்கள் மாநிலங்களுக்கு திரும்ப வழங்கப்பட்டால் மட்டுமே அதனை பின்பற்ற முடியும் எனவும் தெரிவித்தனர்.

உச்ச நீதிமன்ற உத்தரவின்படி, தமிழ்நாட்டில் அகில இந்திய ஒதுக்கீட்டு இடங்களுக்கு, 69 விழுக்காடு இட ஒதுக்கீட்டையே அமல்படுத்த வேண்டும் என திமுக தரப்பு மூத்த வழக்கறிஞர் வில்சன் விளக்கமளித்தார்.

ஒன்றிய அரசு வாதம்

ஒன்றிய அரசு சார்பில் ஆஜரான வழக்கறிஞர் நடராஜன், மருத்துவப் படிப்புகளில் அனைத்து மாநில மாணவர்களும் பயனடைய உச்ச நீதிமன்ற உத்தரவின்படி, அகில இந்திய ஒதுக்கீடு கொண்டு வரப்பட்டதாகவும், தகுதி அடிப்படையில் மட்டுமே அந்த இடங்கள் நிரப்பப்பட்டதாகவும், 2017-18ஆம் ஆண்டு முதல் பட்டியலினத்தவர்களுக்கு 15 விழுக்காடு, பழங்குடியினருக்கு 7.5 விழுக்காடு இட ஒதுக்கீடு வழங்கப்பட்டு வருவதாகவும் தெரிவித்தார்.

அகில இந்திய ஒதுக்கீடு என்பது அகில இந்திய கொள்கை என்பதால், அகில இந்திய இட ஒதுக்கீட்டிற்குதான் பொருந்தும் என்றும், மாநில அரசு இட ஒதுக்கீடு பொருந்தாது எனவும் அவர் குறிப்பிட்டார்.

அகில இந்திய ஒதுக்கீட்டு இடங்களுக்கு மாநிலங்களின் இட ஒதுக்கீட்டை பின்பற்றுவது குழப்பத்தை ஏற்படுத்தும் எனக் கூறிய அவர், அகில இந்திய ஒதுக்கீட்டு இடங்களில் பட்டியலினத்தவர், பழங்குடியினருக்கு ஒன்றிய அரசின் இட ஒதுக்கீட்டை பின்பற்றும் தமிழ்நாடு அரசு, இதர பிற்படுத்தபட்டவர்களுக்கு மாநில அரசு இட ஒதுக்கீட்டை பின்பற்ற எப்படி என்றும் கேள்வி எழுப்பினார்.

வழக்கில் இரு தரப்பு வாதங்களும் முடிவடையாததால், வழக்கின் விசாரணையை தலைமை நீதிபதி அமர்வு, ஆகஸ்ட் 17ஆம் தேதிக்கு தள்ளிவைத்தது.

இதையும் படிங்க:ஐஐடி இடஒதுக்கீடு: ராம்கோபால் ராவ் குழு அறிக்கையை நிராகரிக்குமாறு சு.வெங்கடேசன் எம்.பி கோரிக்கை