நெடுஞ்சாலைத் துறை பணி நியமனத்தில் முறைகேடு: அரசு அறிக்கை அளிக்க உத்தரவு

சென்னை: நெடுஞ்சாலைத் துறை மண்டல கணக்காளர்கள் பணி நியமனத்தில் நடைபெற்ற முறைகேடு தொடர்பாக எடுத்த நடவடிக்கை குறித்து அறிக்கைத் தாக்கல்செய்ய அரசுக்கு உயர் நீதிமன்றம் உத்தரவிட்டுள்ளது.

நெடுஞ்சாலைத் துறை மண்டல கணக்காளர்கள் பணி நியமனத்தில் நடைபெற்ற முறைகேடு தொடர்பாக எடுத்த நடவடிக்கை குறித்து அறிக்கைத் தாக்கல்செய்ய தமிழ்நாடு அரசுக்கு சென்னை உயர் நீதிமன்றம் உத்தரவிட்டுள்ளது.

நெடுஞ்சாலைத் துறை மண்டல கணக்காளர்கள் பணி நியமனத்தில் 2016ஆம் ஆண்டுமுதல் நடைபெற்ற முறைகேடுகள் குறித்து சிபிஐ விசாரணைக்கு உத்தரவிடக்கோரி வழக்கறிஞர் எம்.எல். ரவி பொதுநல வழக்குத் தொடர்ந்திருந்தார்.

அந்தத் தேர்வில் தேர்வான 10 பேரின் தேர்வை ரத்துசெய்ய அரசு செயலாளர் பரிந்துரை செய்திருந்ததாகவும், ஆனால், நெடுஞ்சாலைத் துறை இயக்குநர் எட்டு பேரின் தேர்ச்சியை மட்டுமே ரத்துசெய்துள்ளதாகக் குற்றஞ்சாட்டியிருந்தார்.

அரசு அறிக்கை அளிக்க நீதிமன்றம் உத்தரவு

டி.என்.பி.எஸ்.சி. முறைகேடுபோல, விடைத்தாள் மாற்றம் செய்து முறைகேடு மூலம் தேர்வு முடிவுகளை நெடுஞ்சாலைத் துறை வெளியிட்டுள்ளதாகவும், ஏற்கனவே மண்டல கணக்காளர் மீது நான்கரை லட்ச ரூபாய் அளவிற்கு லஞ்ச ஒழிப்பு வழக்கை சிபிஐ பதிவு செய்துள்ளதாகவும் குறிப்பிட்டிருந்தார்.

இந்தத் தேர்வு குறித்து முழுமையாக விசாரணை நடத்த சிபிஐ-க்கு உத்தரவிட வேண்டும் எனவும் கோரிக்கைவைத்திருந்தார். இந்த வழக்கு தலைமை நீதிபதி சஞ்ஜிவ் பானர்ஜி, நீதிபதி செந்தில்குமார் ராமமூர்த்தி அடங்கிய அமர்வில் விசாரணைக்கு வந்தபோது, தமிழ்நாடு அரசுத் தரப்பில், குற்றச்சாட்டுக்கு ஆளான பத்து விண்ணப்பதாரர்களின் தேர்ச்சி சான்றிதழ் ரத்துசெய்யப்பட்டுள்ளதாகத் தெரிவிக்கப்பட்டது.

இதையடுத்து, இந்த முறைகேடு புகார் மீது எடுத்த நடவடிக்கை குறித்த அறிக்கையைத் தாக்கல்செய்ய தமிழ்நாடு அரசுக்கு உத்தரவிட்ட நீதிபதிகள் விசாரணையை ஆறு வாரங்களுக்குத் தள்ளிவைத்தனர்.