இட ஒதுக்கீட்டிற்கு பாதிப்பு வருமா? மத்திய அரசிற்கு தமிழ்நாடு அரசு கடிதம்

சென்னை: அண்ணா பல்கலைக்கழகத்திற்கு சீர்மிகு பல்கலைகழக அந்தஸ்தினை வழங்கினால் இட ஒதுக்கீட்டிற்கு பாதிப்பு ஏற்படுமா என்பது குறித்து மத்திய அரசுக்கு கடிதம் எழுதியுள்ளதாக உயர்கல்வித் துறை செயலாளர் மங்கத் ராம் சர்மா தெரிவித்துள்ளார்.

தமிழ்நாட்டில் உள்ள கல்லூரிகளில் ஆராய்ச்சிகளை மேம்படுத்துவது தொடர்பான கருத்தரங்கு உயர்கல்வித் துறை சார்பில் நடைபெற்றது. இந்தக் கருத்தரங்கில் கலந்து கொண்ட பின்னர் செய்தியாளர்களிடம் பேசிய உயர்கல்வித்துறை செயலாளர் மங்கத் ராம் சர்மா, "தமிழ்நாடு அரசு ஆறு பல்கலைக்கழகங்களுக்கு ரூ.20 கோடி ஒதுக்கீடு செய்ய முடிவு செய்துள்ளது. அவற்றில் முதல்கட்டமாக ரூ.7 கோடி ஒதுக்கீடு செய்யப்பட்டுள்ளது. மத்திய அரசு ஆராய்ச்சி படிப்புகளுக்கு வழங்கவேண்டிய நிதியினை வழங்க கால தாமதமானாலும் தமிழ்நாடு அரசு முன்கூட்டியே வழங்கியுள்ளது.

யுஜிசி நெட் தேர்வு முடித்தாலும் பிஎச்டி படிப்பு அவசியமாகிறது. பல்கலைக்கழக மானியக் குழுவின் விதிமுறைகளின்படி அனைத்து கல்லூரி விரிவுரையாளர்கள் ஆராய்ச்சி பட்டபடிப்பை முடிக்க வேண்டிய அவசியம் உள்ளது. தற்போது முடிக்காமல் கல்லூரிகளில் பணிபுரியும் விரிவுரையாளர்களுக்கு மீண்டும் செட், நெட் தேர்வினை நடத்துவதற்கு உயர்கல்வித் துறை அண்ணாமலை பல்கலைக்கழகத்திற்கு அறிவுரை வழங்கியுள்ளது.

அண்ணா பல்கலைக்கழகத்திற்கு சீர்மிகு பல்கலைக்கழக அந்தஸ்தினை வழங்குவதற்கு தமிழ்நாடு அரசு தயாராக உள்ளது. ஆனால் அதே நேரத்தில் தமிழ்நாட்டில் பின்பற்றப்பட்டுவரும் இட ஒதுக்கீட்டிற்கு பாதிப்பு ஏற்படாத வகையில் செயல்படுத்திட வேண்டும் என அரசு கருதுகிறது. எனவே இதுகுறித்து விளக்கம் கேட்டு மத்திய அரசிற்கு கடிதம் எழுதப்பட்டுள்ளது. அதில் சீர்மிகு அந்தஸ்து வழங்கப்பட்ட தமிழ்நாடு மாணவர் சேர்க்கைக்கு பாதிப்பு வருமா என்பதை மத்திய அரசு தெளிவுபடுத்த வேண்டும் என மாநில அரசு கோரியுள்ளது. அதுகுறித்த விபரம் வந்தவுடன் சீர்மிகு பல்கலைக்கழக அந்தஸ்து வழங்குவது குறித்து அரசு முடிவெடுக்கும்" என தெரிவித்தார்.

இதையும் படிங்க:'தேடல் குழு' தகுதியான நபர்களைப் புறக்கணிக்கிறது - பேராசிரியர்கள் குற்றச்சாட்டு!