பண்ருட்டி நீர்நிலை ஆக்கிரமிப்புகளை அகற்ற நீதிமன்றம் உத்தரவு

பண்ருட்டி அருகே நீர்நிலை ஆக்கிரமிப்புகளை ஒரு மாதத்திற்குள் அகற்ற வேண்டும் எனச் சென்னை உயர் நீதிமன்ற பொறுப்புத் தலைமை நீதிபதி அமர்வு எச்சரித்துள்ளது.

சென்னை: 2018ஆம் ஆண்டு கடலூரின் பண்ருட்டியில் உள்ள செட்டிப்பட்டறை ஏரி, களத்துமேடு ஏரி ஆகிய நீர்நிலைகள் ஆக்கிரமிக்கப்பட்டது தொடர்பாக சென்னை உயர் நீதிமன்றம் தானாக முன்வந்து பொதுநல வழக்குப் பதிவு செய்தது. இந்த வழக்கானது பொறுப்புத் தலைமை நீதிபதி முனீஷ்வர் நாத் பண்டாரி, நீதிபதி பி.டி. ஆதிகேசவலு ஆகியோர் அடங்கிய அமர்வு முன்பு நேற்று (நவம்பர் 23) விசாரணைக்கு வந்தது.

அப்போது செட்டிப்பட்டறை ஏரியில் கட்டப்பட்ட 138 வீடுகள் அகற்றப்பட்டன என நகராட்சி அலுவலர்கள் தெரிவித்தனர். தொடர்ந்து களத்துமேடு ஏரியின் ஆக்கிரமிப்புகளை அகற்ற கால அவகாசம் தரும்படி அலுவலர்கள் தரப்பில் கேட்கப்பட்டது. அப்போது அலுவலர்களின் செயலுக்கு நீதிபதிகள் கண்டனம் தெரிவித்தனர்.

அப்போது பேசிய நீதிபதிகள், “அலுவலர்கள் மெத்தனப்போக்குடன் நடந்துகொண்டதை ஏற்க முடியாது. நீர்ப்பிடிப்புப் பகுதியில் ஆக்கிரமிப்புகள் உள்ளன. நீர் பற்றாக்குறை நிலவியபோது, அலுவலர்கள் நீர்த்தேக்கங்களைச் சரியாகக் கவனிக்கவில்லை.

ஒரு மாதத்திற்குள் இந்த ஆக்கிரமிப்புகளை அகற்ற வேண்டும். இல்லையெனில் சம்பந்தப்பட்ட நகராட்சி அலுவலர்கள் நேரில் முன்னிலையாக நேரிடும்” என்றனர். பின்னர் இந்த வழக்கு விசாரணை நவம்பர் 26ஆம் தேதிக்குத் தள்ளிவைக்கப்பட்டது.

இதையும் படிங்க:Special DGP Case: முன்னாள் சிறப்பு டிஜிபி கோரிக்கை நிராகரிப்பு