சென்னை தலைமை செயலகத்தில் இளைஞர் நலன் மற்றும் விளையாட்டு துறை அமைச்சர் மெய்யநாதன் செய்தியாளர்களை சந்தித்தார். அப்போது பேசிய அவர், “டோக்கியோ ஒலிம்பிக் போட்டியில் கலந்துகொண்டிருக்கும் தமிழ்நாடு வீரர்களை உற்சாகப்படுத்தும் விதமாக ’வென்று வா வீரர்களே’ எனும் பாடல், ட்விட்டர் ஹேஷ் டேக் முதலமைச்சரால் தொடங்கப்பட்டுள்ளது.
இதன் மூலம் வீரர்களுடன் துணை நிற்கிறோம். அது மட்டுமில்லாமல் அடுத்த ஒலிம்பிக் போட்டியில், தமிழ்நாட்டில் இருந்து குறைந்தபட்சம் 25 பதக்கங்களை வெல்ல வேண்டும் என்பதே நமது இலக்கு. இந்த பாடலுக்கு இசையமைத்த யுவன் சங்கர் ராஜாவுக்கு நன்றி. தமிழ்நாடு வீரர்கள் வெற்றியோடு திரும்புவார்கள் என்ற நம்பிக்கை உள்ளது.