RN Ravi: "விமர்சனங்களை எதிர்கொள்ள வலிமை கொடுத்தது பகவத்கீதை" - ஆளுநர் ஆர்.என்.ரவி!

விமர்சனங்களை சந்தித்த போதெல்லாம் வலிமையை கொடுத்தது பகவத் கீதை என தமிழ்நாடு ஆளுநர் ஆர்.என்.ரவி தெரிவித்துள்ளார்.

சென்னை: சேத்துப்பட்டில் உள்ள தனியார் மண்டபத்தில் விஷ்வாஷ் குளோபல் குழு பள்ளி மாணவர்களை ஒருங்கிணைத்து கோடை கால ஆன்மீக இசை நிகழ்ச்சி நடைபெற்றது. இந்நிகழ்ச்சியில் சிறப்பு விருந்தினராக தமிழ்நாடு ஆளுநர் ஆர்.என்.ரவி கலந்து கொண்டு சிறப்பித்தார். அதில் 40-க்கும் மேற்பட்ட பள்ளிகளில் இருந்து ஆயிரத்திற்கும் மேற்பட்ட பள்ளி மாணவ, மாணவிகள் மற்றும் பெற்றோர்கள் கலந்து கொண்டனர்.

இந்த நிகழ்ச்சியில் பேசிய ஆளுநர் ஆர்.என்.ரவி, "இன்று உலகம் பௌதிக அறிவின் முன்னேற்றத்தை அதிகம் அனுபவித்து வருகிறது. இன்றைய காலகட்டத்தில் இந்த உலகம் கரோனா பெருந்தொற்று, வறுமை, போர், காலநிலை மாற்ற நெருக்கடி உள்ளிட்ட பிரச்னைகளை சந்தித்து வருகிறது. இவை அனைத்தும் பௌதிக புத்தி மற்றும் பகுதி பௌதிக வித்யானின் விளைவுகள் தான்.நாம் இன்று நமது உடல்நிலை சீராக இருக்க பல்வேறு வசதிகளை செய்துக் கொள்கிறோம். ஆனால் நிம்மதி இல்லை. இன்றைய காலத்தில் குடும்பங்களும் மன அழுத்தத்தில் உள்ளன. குடும்பம் உடைந்து வருகின்றது. பெற்றோர்கள் குழந்தைகள் என அனைவரும் ஒரே இடத்தில் ஒன்றாக சேர்ந்து அமர்ந்திருப்பார்கள்.

ஆனால் உடல் அளவில் மட்டும் தான் ஒன்றாக அமர்ந்திருப்பார்கள், மனதளவில் ஒவ்வொருவரும் ஒரு பக்கம் செல்போனில் பிஸி ஆக இருப்பார்கள். எனவே இந்த உலகத்தில் குடும்பங்களும் மன அழுத்தத்தில் தான் உள்ளன. இந்தியா சுதந்திரம் அடைந்த போது இந்தியாவின் சுதந்திரத்திற்காக போராடிய ரிஷி அரபிந்தோ ஒரு காலகட்டத்தில் தன் வாழ்நாளை கழிக்க பாண்டிச்சேரிக்கு சென்று விட்டார்.

அவர் உலகத்தை கண்காணிக்க ஆரம்பித்தார் முதல் உலகப்போர் மிகவும் மனித நேயமற்றதாகவும், இரண்டாவது உலகப் போர் அதைவிட மனிதநேயமற்ற போராகவும் இருந்ததை கண்டார். மனிதர்கள் இனத்தாலும், மதத்தாலும் ஒருவரை ஒருவர் மனித நேயமின்றி தாக்கிக் கொள்வதை கண்டு கவலைப்பட்டார். ஆகையால் மனித நேயத்தை வெளிப்படுத்துவதற்காக பெரிதும் போராடினார்.

கடந்த ஆயிரம் வருடங்களாக பாரதம் பல்வேறு பிரச்னைகளை சந்தித்து வருகிறது. பாரதம் வலிமையாக இருக்க வேண்டும், சுவாமி விவேகானந்தர் கூறியது போல ஒட்டுமொத்த உலகமும் நமது குடும்பம். இதைதான் ரிஷி அரபிந்தோவும் ஆசைப்பட்டார். பாரதம் அதன் அத்யாத்திரிக் அறிவைக் கொண்டு வலிமையாக இருக்க வேண்டும். பாரதம் வளர வேண்டும். பாரதம் உலகத்தை காப்பாற்ற வேண்டும் என்றார்.

மேலும் இந்திய பாரதம் தான் உலகத்தை காப்பாற்ற முடியும், மனித நேயத்தை காப்பாற்ற முடியும். அதை தான் தற்பொழுது இந்திய பாரதம் செய்து வருகிறது. சில வருடங்களுக்கு முன்பு 140 கோடி மக்கள் தொகை கொண்ட இந்த இந்திய நாட்டை உலக அளவில் யாரும் கண்டு கொள்ளவில்லை. ஆனால் தற்பொழுது நாடு பேசும்போது நாட்டின் பிரதமர் உரையாற்றும் பொழுது உலகமே கவனத்துடன் உற்று நோக்குகிறது.

இன்று இந்தியா உலகத்துக்கு வழிகாட்டி வருகிறது. கரோனா காலத்தில் தடுப்பூசிகளை உலக நாடுகள் மற்ற நாடுகளுக்கு பகிர்ந்து கொள்ளவில்லை. ஆனால் இந்தியா 150 நாடுகளுக்கு பகிர்ந்து கொண்டது. அதுவும் இலவசமாக பகிர்ந்து கொண்டது. இது தான் இந்தியா ‘யாதும் ஊரே யாவரும் கேளிர்’ என்பதை இந்திய முழுமையாக நம்புகிறது.

பகவத் கீதையின் அர்த்தத்தை யாராலும் முழுமையாக புரிந்து கொள்ள முடியாது. குருக்கள் ஞானிகளால் கூட இதன் அர்த்தத்தை முழுமையாக அறிந்து கொள்ள முடியாது. இது மிகவும் ஆழமான கருத்துக்களை கொண்டது. இதனை ஒரு முறை மனப்பாடம் செய்து கொண்டால், சிறந்த மனிதராக உங்களை உருவாக்கும். 5-வது படிக்கும் போதே நான் பகவத் கீதையை முழுமையாக மனப்பாடம் செய்து வைத்து விட்டேன்.

எனது வாழ்க்கையில் தற்போது வரை பகவத் கீதை உறுதுணையாக உள்ளது. மீண்டும் மீண்டும் பகவத் கீதையை பார்க்கிறேன்... படிக்கிறேன். ஒவ்வொரு முறை படிக்கும் போதும் எனக்கு புது புது அர்த்தத்தை தந்து கொண்டே இருக்கிறது. நான் ஒரு முறை ஜம்மு காஷ்மீரில் எதிரிகளால் சூழப்பட்ட போது, அதிலிருந்து நல்ல உடல் நலத்துடன் மீண்டு வர பகவத் கீதை எனக்கு உதவியாக இருந்தது. பகவத் கீதை வாழ்க்கை முழுவதும் உங்களுக்கு துணையாக இருக்கும்.

எனக்கு இன்று 70 வயதிற்கும் மேல் ஆகிறது. நான் பல்வேறு பிரச்னைகளை சந்தித்துள்ளேன். ஆனால் பகவத் கீதையின் உதவியால் என்னுடைய குறிக்கோளில் இருந்து ஒருபோதும் விலகியதில்லை. அதேபோல் பல்வேறு விமர்சனங்களையும் நான் சந்தித்து உள்ளேன். அந்த நேரங்களில் பகவத் கீதை எனக்கு வலிமையை தந்துள்ளது. தொடர்ந்து பகவத் கீதை உடன் தொடர்பில் இருங்கள். அதனை மாணவர்கள் பயிற்சி செய்யுங்கள்.

எப்போதும் நமது வாழ்க்கை ரோஜா பூக்கள் நிறைந்த படுக்கையாக இருக்காது. ஏற்ற இறக்கங்கள் இறக்கத்தான் செய்யும். அந்த நேரங்களில் பகவத் கீதை உங்களுக்கு வலிமை கொடுக்கும். ஆகையால் தொடர்ந்து அதனுடன் தொடர்பில் இருங்கள்” என ஆளுநர் ஆர்.என்.ரவி தெரிவித்தார்.