திருச்சி சட்டப்பல்கலைக்கழக மாணவர் சேர்க்கையில் 69 விழுக்காடு இடஒதுக்கீட்டைப் பின்பற்ற அரசாணை வெளியீடு

திருச்சிராப்பள்ளி தமிழ்நாடு தேசிய சட்டப்பல்கலைக்கழகத்தின், மாணவர் சேர்க்கையில் 2022-23ஆம் கல்வியாண்டு முதல் அகில இந்திய ஒதுக்கீட்டில் 69 விழுக்காடு இட ஒதுக்கீட்டைப் பின்பற்றிட அரசாணை வெளியிடப்பட்டுள்ளது.

சென்னை: தமிழ்நாடு அரசு இன்று (மார்ச் 2) வெளியிட்டுள்ள அரசாணையில், "தமிழ்நாட்டில், தேசிய அளவிலான மிகச்சிறந்த சட்டக்கல்வி வழங்கும் பொருட்டு, 2012ஆம் ஆண்டு தமிழ்நாடு தேசிய சட்டப் பல்கலைக்கழகம் திருச்சிராப்பள்ளியில் தோற்றுவிக்கப்பட்டு 2013-2014ஆம் கல்வியாண்டு முதல் செயல்பட்டு வருகிறது. இதில் தற்சமயம் 521 மாணவர்கள் சட்டக்கல்வி பயின்று வருகின்றனர்.

அகில இந்திய ஒதுக்கீடு

தமிழ்நாடு தேசிய சட்டப்பல்கலைக்கழகத்தின் மாணவர் சேர்க்கையானது பொது சட்டப்படிப்பு நுழைவுத் தேர்வு (Common Law Admission Test - CLAT) மூலம் நடைபெறுகிறது. இந்தப் பல்கலைக்கழகத்திற்கென ஒப்பளிக்கப்பட்ட மொத்த இடங்களுள் 45 விழுக்காடு இடங்கள் தமிழ்நாட்டினை வசிப்பிடமாகக் கொண்ட மாணவர்களாலும் (Resident students of Tamil Nadu), 50 விழுக்காடு இடங்கள் அகில இந்திய ஒதுக்கீட்டின் (All India Quota) அடிப்படையிலும் மற்றும் 5 விழுக்காடு இடங்கள் வெளிநாடு வாழ் இந்தியர்களுக்கான (NRI Quota) ஒதுக்கீட்டின்கீழும் பூர்த்தி செய்யப்படுகிறது.

பட்டியல் சாதி

தமிழ்நாட்டினை வசிப்பிடமாகக் கொண்ட மாணவர்களுக்கான (45%) இடங்களைப் பொறுத்தமட்டில், அவை தமிழ்நாடு அரசின் 69 விழுக்காடு இட ஒதுக்கீட்டு கொள்கையினைப் பின்பற்றி பூர்த்தி செய்யப்படுகிறது. 50 விழுக்காடு அகில இந்திய இட ஒதுக்கீட்டுக்கான இடங்களைப் பொறுத்தமட்டில் 15 விழுக்காடு இடங்கள் பட்டியல் சாதியினருக்கும் (SC) 7.5 விழுக்காடு இடங்கள் பட்டியல் பழங்குடியினருக்கும் (ST) மீதமுள்ள 77.5 விழுக்காடு இடங்கள் பொதுமுறைப் போட்டியிலும் (Open Competition) பூர்த்தி செய்யப்படுகின்றன.

மாணவர் சேர்க்கை

இருப்பினும், அகில இந்திய இட ஒதுக்கீட்டுக்கான இடங்களுள் பிற்படுத்தப்பட்ட வகுப்பினர் அல்லது இதர பிற்படுத்தப்பட்ட வகுப்பினருக்கென தனியே இட ஒதுக்கீடு ஏதும் இதுவரை வழங்கப்படவில்லை. எனவே, மேற்சொன்ன சூழலைக் கவனமுடன் கருத்தில் கொண்டு, விரிவான பரிசீலனைக்குப் பின் தமிழ்நாடு தேசிய சட்டப்பல்கலைக்கழகத்தின் இளங்கலை, முதுகலை மற்றும் ஆராய்ச்சி படிப்புகளுக்கான மாணவர் சேர்க்கையில், அகில இந்திய இட ஒதுக்கீட்டுக்கான 50 விழுக்காடு இடங்களையும், தமிழ்நாட்டினை வசிப்பிடமாகக் கொண்ட மாணவர்களுக்கான ஒதுக்கீட்டில் பின்பற்றப்பட்டு வரும் மாநில அரசின் இட ஒதுக்கீட்டுக் கொள்கையான 69 விழுக்காடு (பொதுப் பிரிவு - 31 விழுக்காடு, பழங்குடியினர் - 1 விழுக்காடு பட்டியலினத்தவர் - 18 விழுக்காடு மற்றும் இதர பிற்படுத்தப்பட்ட வகுப்பினர் - 50 விழுக்காடு)-ஐ போன்றே பின்பற்றிடத் தமிழ்நாடு அரசு முடிவு செய்து அவ்வாறே ஆணை வெளியிட்டுள்ளது.

உரியப் பிரதிநிதித்துவம்

அரசின் இந்த முடிவின் மூலம் பிற்படுத்தப்பட்ட வகுப்பினர் / இதர பிற்படுத்தப்பட்ட வகுப்பினருக்கான உரியப் பிரதிநிதித்துவத்தை வழங்கி சமூக நீதியை நிலைநாட்டுவதோடு மட்டுமல்லாமல், தமிழ்நாடு தேசிய சட்டப் பல்கலைக்கழகத்தின் அகில இந்திய ஒதுக்கீட்டுக்கான இடங்களுள் அவர்களுக்கு அதிகபட்சமாக 50 விழுக்காடு இடங்களை உறுதி செய்து நாட்டிற்கே முன்மாதிரி மாநிலமாகத் தமிழ்நாடு திகழ்கிறது" எனக் குறிப்பிடப்பட்டுள்ளது.

இதையும் படிங்க:ஆப்ரேஷன் கங்கா மன நிம்மதியை தருகிறது; தமிழிசை சௌந்தரராஜன்