துபாயிலிருந்து சென்னை வந்த விமானத்தில் 286 கிராம் தங்கக் கடத்தல்!

சென்னை: துபாயிலிருந்து சென்னை வந்த தனியாா் மீட்பு விமானத்தில் கடத்திக் கொண்டுவரப்பட்ட 286 கிராம் தங்கத்தை சுங்கத் துறை அலுவலர்கள் பறிமுதல்செய்தனர்.

துபாயிலிருந்து சென்னை சா்வதேச விமான நிலையத்திற்கு இன்று (நவ. 30) அதிகாலை இண்டிகோ ஏா்லைன்ஸ் மீட்பு விமானம் வந்தது. அதில் வந்த பயணிகளைச் சுங்கத் துறை அலுவலர்கள் சோதனைசெய்தனர். அப்போது சென்னையைச் சேர்ந்த சையத் நதீம் ரகுமான் (33) பயணி மீது அலுவலர்களுக்குச் சந்தேகம் ஏற்பட்டது.

அவரைச் சோதனை செய்தபோது, பையில் முகத்தை அழகுப்படுத்த பூசப்படும் பேஸ் கிரீம், நகம் வெட்டிகள் இருந்தன. உடனே அலுவலர்கள் ஃபேஸ் க்ரீம் டப்பாவை திறந்து பார்த்தனர்.

அப்போது, அதில் தங்க பேஸ்ட்கள் மறைத்துவைத்திருந்தது தெரியவந்தது. அதேபோல் நகம் வெட்டிகளுக்குள், தங்கத் துண்டுகள் இருந்தன. மொத்தம் சுமார் 286 கிராம் உள்ள அத்தங்கத்தின் மதிப்பு, 14.12 லட்சம் ரூபாய் என்று கூறப்படுகிறது.

இதனையடுத்து 286 கிராம் தங்கத்தைக் கைப்பற்றியதோடு, சையத் நதீம் ரகுமானை சுங்கத் துறை அலுவலர்கள் கைதுசெய்து விசாரணை நடத்திவருகின்றனர்.

இதையும் படிங்க:சென்னை விமான நிலையத்தில் ரூ. 1.57 மதிப்பிலான தங்கம் பறிமுதல்