போதை சாக்லெட் விற்பனை: 3 வடமாநிலத்தவர்கள் கைது!

சென்னை: சவுக்கார்பேட்டையில் போதை சாக்லேட், கஞ்சா விற்பனை செய்துவந்த மூன்று வடமாநிலத்தவர்களை காவல் துறையினர் கைது செய்து விசாரணை நடத்திவருகின்றனர்.

சென்னை சவுக்கார்பேட்டையில் கஞ்சா, புகையிலை மற்றும் போதை சாக்லேட்டுகளை உள்ளிட்ட போதை பொருட்களை வெளிமாநிலத்தில் இருந்து கொண்டு வந்து சப்ளை செய்து வருவதாக பூக்கடை காவல்துறையினருக்கு ரகசிய தகவல் கிடைத்தது. இதனால் தனிப்படை அமைக்கப்பட்டு, தீவிரமாக தேடிவந்தனர்.

இந்நிலையில், சென்னை சென்ட்ரல் ரயில் நிலைய 11ஆவது பிளாட்பார்ம் அருகே சந்தேகத்திற்கிடமாகச் சுற்றி திரிந்த 3 வடமாநிலத்தவர்களை காவல்துறையினர் பிடித்து விசாரணை செய்தனர். அப்போது அவர்களிடம் 25 கிராம் கஞ்சா, புகையிலை மற்றும் 200 போதை சாக்லேட்டுகள் இருப்பது கண்டுபிடிக்கப்பட்டது.

பறிமுதல் செய்யப்பட்ட போதை பொருட்கள்

இதையடுத்து, கைது செய்யப்பட்டவர்களிடம் நடத்தப்பட்ட விசாரணையில், இவர்கள் பிகார் மாநிலத்தைச் சேர்ந்த சான்வாஷ் வார்சாடி(31), மகூன் குமார்(18), பாபு குமார் என்பது தெரியவந்தது.

இவர்கள் பிகாரில் இருந்து போதை பொருட்களை ரயில் மூலம் கடத்தி வந்து சென்னை சவுக்கார்பேட்டையில் சப்ளை செய்து வந்தது தெரியவந்தது. தற்போது கைது செய்யப்பட்டவர்களின் பின்னணி குறித்து தீவிர விசாரணை நடத்தப்பட்டு வருகிறது.

இதையும் படிங்க: திருட வந்தபோது போதையில் தூங்கியதால் காவலரிடம் சிக்கிய திருடன்!