மன உளைச்சலில் வாலிபர் தூக்கிட்டு தற்கொலை!

சென்னை: தந்தையின் நினைவாக இருந்த இருசக்கர வாகனம் திருடு போனதால் மன உளைச்சலில் இருந்த புரசைவாக்கத்தைச் சேர்ந்த இளைஞர் தூக்கிட்டு தற்கொலை செய்துகொண்டார்.

சென்னை புரசைவாக்கம் தாண்டவராயன் தெருவில் வசித்து வந்தவர் தியாகராஜன் (21). பள்ளிப்படிப்பை முடித்துவிட்டு செல்போன் கடையில் பணிபுரிந்துவந்தார். நடுத்தர வர்க்கத்தைச் சேர்ந்த குடும்பமாக இருந்தாலும், இவரது விருப்பபடி உயர் ரக R15 இரு சக்கர வாகனத்தை ஒரு லட்சத்து 60 ஆயிரம் கொடுத்து அவரது தந்தை வாங்கிக் கொடுத்துள்ளார்.

சில மாதங்களில் அவரது தந்தை உடல்நிலை பிரச்னை காரணமாக உயிரிழந்தார். இதன்பின் தந்தையின் நினைவாக தனது இருசக்கர வாகனத்தை தியாகராஜன் பாதுகாத்து வந்துள்ளார். இந்நிலையில், கடந்த ஏப்ரல் 05 ஆம் தேதி வீட்டின் முன் நிறுத்திவைக்கப்பட்டிருந்த இவரது இரு சக்கர வாகனத்தை அடையாளம் தெரியாத நபர்கள் திருடிச் சென்றுள்ளனர்.

இதுதொடர்பாக வேப்பேரி காவல் நிலையத்தில் புகார் அளித்ததன்பேரில், காவல்துறையினர் சிசிடிவி காட்சிகளின் உதவிகளோடு குற்றவாளிகளைத் தேடிவந்தனர். கரோனா பாதிப்பு காரணமாக, வழக்கில் தொய்வு ஏற்பட்ட நிலையில் குற்றவாளிகளைப் பிடிக்க காலதாமதம் ஆனதாக கூறப்படுகிறது.

கடந்த ஒரு மாத காலமாக இருசக்கர வாகனம் திருடு போனதால் மன உளைச்சலில் இருந்த இளைஞர் நேற்று நண்பகல் அவரது வீட்டில் தூக்கிட்டு தற்கொலை செய்துகொண்டார். தகவலறிந்து சம்பவ இடத்திற்கு வந்த வேப்பேரி காவல்துறையினர் வழக்குப்பதிவு செய்து உடலை கைப்பற்றி ராஜீவ்காந்தி மருத்துவனையில் உடற்கூறாய்வுக்காக அனுப்பிவைத்தனர்.

இதுபற்றி வேப்பேரி காவல்துறையினர் கூறியதாவது, தற்கொலை செய்துகொண்ட இளைஞர் போதைக்கு அடிமையாகி இருந்ததாகவும், போதைப் பொருள்கள் வாங்க குடும்பத்தினர் பணம் தராததால் ஏற்கெனவே இரண்டுமுறை தற்கொலைக்கு முயன்றதாகவும், இதனால் காவல் நிலையத்திற்கு அழைத்து எழுதி வாங்கி அனுப்பியதாகவும் தெரிவித்துள்ளனர். மேலும், இந்த தற்கொலைக்குக் காரணம் இருசக்கர வாகனம் காணாமல் போனது இல்லை என மறுப்பு தெரிவித்தனர்.

இதையும் பார்க்க: விஷவாயுவால் உயிரிழந்தவர்களின் குடும்பத்தினருக்கு தலா ஒரு கோடி - ஆந்திர முதலமைச்சர்