சென்னை:அதிமுக தலைமை அலுவலகமான எம்ஜிஆர் மாளிகையில் அக்கட்சியின் பொதுச்செயலாளர் எடப்பாடி பழனிசாமி தலைமையில் மாவட்டச் செயலாளர்கள் கூட்டம் நடைபெற்றது. இதில், ஒழுங்கு நடவடிக்கையால் கடந்த 2021ஆம் ஆண்டு இறுதியில் அதிமுகவில் இருந்து நீக்கப்பட்ட முன்னாள் எம்.பி. அன்வர் ராஜா இன்று (ஆக.04) மீண்டும் அக்கட்சியில் இணைந்தார். இதையடுத்து இக்கூட்டத்தில் மதுரை மாநாட்டிற்கான பணிகளின் நிலை, நாடாளுமன்றத் தேர்தலில் பணிகள் எந்நிலையில் இருக்கிறது என்பது குறித்து ஆலோசனை செய்யப்பட்டது.
மேலும், அதிமுகவின் புதிய உறுப்பினர்கள் சேர்த்தல் மற்றும் புதுப்பித்தல், நாடாளுமன்றத் தேர்தலுக்கான கூட்டணி பங்கீடு உள்ளிட்டப் பல்வேறு முக்கிய விவகாரங்கள் ஆலோசிக்கப்பட்டதாக கூறப்படுகிறது. மதுரை மாநாடு சிறப்பாக நடைபெற மாவட்டச் செயலாளர்களுக்கு அறிவுறுத்தப்பட்டுள்ளது. மதுரை மாநாட்டிற்காக பத்துக்கும் மேற்பட்ட குழுக்கள் அமைக்கப்பட்டன. இதில், ஒவ்வொரு குழுவுடனும் தனித்தனியாக எடப்பாடி பழனிசாமி ஆலோசனை மேற்கொண்டார். இன்னும் மாநாட்டிற்கு 15 நாள்களே இருக்கும் நிலையில் பணிகளை விரைவுபடுத்த மாவட்டச் செயலாளர்களை அறிவுறுத்தியுள்ளார்.
ஆலோசனை கூட்டத்திற்குப் பிறகு செய்தியாளர்களைச் சந்தித்த முன்னாள் அமைச்சர் ஜெயக்குமார், "மதுரை மாநாட்டை சிறப்பாக நடத்துவது குறித்து ஆலோசனை செய்தோம். மதுரையைச் சுற்றியுள்ள 11 மாவட்டச் செயலாளர்களுக்கு சிறப்பு அறிவுரைகள் வழங்கப்பட்டுள்ளன. மாநாட்டு ஏற்பாட்டிற்கான கூட்டமே ஒரு சிறிய மாநாடு போன்று இருந்தது.