எம்.ஆர்.விஜயபாஸ்கர் சொத்து மதிப்பு 55 விழுக்காடு உயர்வு

முன்னாள் அமைச்சர் எம்.ஆர். விஜயபாஸ்கர் 2 கோடிய 68 லட்சத்து 38 ஆயிரத்து 857 ரூபாய் வருமானத்திற்கு அதிகமாக சொத்து சேர்த்துள்ளது அம்பலமானது.

சென்னை:முன்னாள் போக்குவரத்துத் துறை அமைச்சர் எம்.ஆர். விஜயபாஸ்கர், வருமானத்திற்கு அதிகமாக சொத்து சேர்த்ததாக அவருக்குச் சொந்தமான 26 இடங்களில் லஞ்ச ஒழிப்புத் துறை அலுவலர்கள் சோதனை நடத்தினர். சோதனையில், அவர் 55 விழுக்காடு அதிகமாக சொத்துகள் சேர்த்தது அம்பலமானது.

2016ஆம் ஆண்டு தேர்தலின் வேட்புமனு தாக்கல் செய்தபோது, தன்னிடம் 2 கோடிய 51 லட்சத்து 91ஆயிரத்து 378 ரூபாய் சொத்து இருப்பதாக முன்னாள் அமைச்சர் எம்.ஆர். விஜயபாஸ்கர் தெரிவித்திருந்தார். 2021ஆம் ஆண்டு சட்டப்பேரவைத் தேர்தலில், 8 கோடி 62லட்சத்து 35 ஆயிரத்து 648 ரூபாய் சொத்து மதிப்பு உள்ளதாக வேட்புமனுத் தாக்கலில் குறிப்பிட்டிருந்தார்.

சொத்து மதிப்பு 55 விழுக்காடு உயர்வு

அமைச்சராக இருந்த காலகட்டத்தில் 6 கோடிய 10 லட்சத்து 44ஆயிரத்து 270 ரூபாய் சொத்துக்களாக சேர்த்துள்ளார். 4 கோடிய 91 லட்சத்து 78 ஆயிரத்து 366 ரூபாய் கடன் வாங்கியுள்ளார். இந்த கால கட்டத்தில் செலவினங்கள் 1 கோடிய 49 லட்சத்து 72ஆயிரத்து 583 மட்டுமே இருப்பது தெரியவந்தது.

இந்நிலையில், கடன் மற்றும் செலவினங்களை அமைச்சராக இருந்த காலகட்டத்தில் சம்பாதித்த 6 கோடிய 10 லட்சத்து 44 ஆயிரத்து 270 ரூபாயை கழித்து பார்த்ததில் 2 கோடிய 68 லட்சத்து 38 ஆயிரத்து 857 ரூபாய் வருமானத்திற்கு அதிகமாக சொத்து சேர்த்துள்ளது தெரியவந்தது.

2016ஆம் ஆண்டிலிருந்து 2021ஆம் ஆண்டு வரை போக்குவரத்துத் துறை அமைச்சராக இருந்தபோது வரவு, செலவு கணக்குகளை ஆய்வு செய்ததில் 55 விழுக்காடு அதிகமாக சொத்து சேர்த்தது தெரியவந்தது.

தகவல் அறிக்கை

இதனடிப்படையில் முன்னாள் அமைச்சர் எம்.ஆர். விஜயபாஸ்கர், அவரது மனைவி விஜயலட்சுமி, சகோதரர் சேகர் ஆகியோர் மீது சொத்துக் குவிப்பு வழக்குப்பதிவு செய்யப்பட்டதாக லஞ்ச ஒழிப்புத் துறை அலுவலர்கள் தெரிவித்துள்ளனர்.

இதையும் படிங்க:சொத்துக்குவிப்பு: சுற்றுச்சூழல் துறை முன்னாள் கண்காணிப்பாளர், அவரது மனைவி மீது வழக்கு