ரூ.35 லட்சம் மதிப்புடைய வெளிநாட்டு பணம் கடத்தல் - பறிமுதல் செய்த சுங்கத்துறையினர்

சென்னையிலிருந்து விமானங்களில் துபாய், இலங்கைக்கு கடத்த முயன்ற, ரூ.35 லட்சம் மதிப்புடைய வெளிநாட்டு கரன்சியை சென்னை விமான நிலையத்தில், சுங்கத்துறையினா் பறிமுதல் செய்தனர்.

சென்னையில் இருந்து துபாய் செல்லும் எமிரேட்ஸ் ஏர்லைன்ஸ் பயணிகள் விமானம் நேற்று (மார்ச் 30) சென்னை சர்வதேச விமான நிலையத்தில் இருந்து புறப்படத் தயாரானது. அதில் பயணிக்க வந்த பயணிகளின் உடைமைகளை சுங்கத்துறை அலுவலர்கள் கண்காணித்து சந்தேகப்பட்ட பயணிகளை சோதனையிட்டு அனுப்பி கொண்டிருந்தனர்.

அப்போது சென்னையை சேர்ந்த 4 ஆண்கள் ஒரு குழுவாக துபாய்க்கு செல்ல வந்திருந்தனர். அவர்களுடைய நடவடிக்கைகள் அலுவலர்களுக்கு சந்தேகத்தை ஏற்படுத்தியது. இதையடுத்து அந்த பயணிகளின் உடைமைகளை முழுமையாக சோதித்தனர். அதில் எதுவுமில்லை. ஆனாலும் சந்தேகம் தீராமல் 4 பயணிகளையும் தனி அறைக்கு அழைத்துச் சென்று சோதித்தனர்.

அப்போது அவா்களின் உள்ளாடைகளுக்குள், கட்டு கட்டாக அமெரிக்க டாலர், யூரோ, கரன்சி உள்ளிட்டவை மறைத்து வைத்திருப்பதை கண்டு பிடித்தனா். இதையடுத்து அதனை பறிமுதல் செய்தனர்.

இந்நிலையில் சென்னையில் இருந்து இலங்கை செல்லும் இண்டிகோ ஏர்லைன்ஸ் பயணிகள் விமானத்தில் பயணம் செய்ய வந்த, சென்னையைச் சேர்ந்த 25 வயது ஆண் ஒருவர், அவருடைய உள்ளடைக்குள் கட்டுக்கட்டாக அமெரிக்க டாலர் மறைத்து கடத்த முயன்றதை சுங்கத்துறையினர் கண்டறிந்தனர். இதையடுத்து அவருடைய பயணத்தையும் ரத்து செய்து, அவரிடம் இருந்த வெளிநாட்டு பணத்தை பறிமுதல் செய்தனர்.

இந்த ஐந்து பேரிடமிருந்து ரூ.35 லட்சம் மதிப்புடைய வெளிநாட்டு பணத்தை பறிமுதல் செய்தனர். இந்த ஐந்து பேரும் ஒரே கடத்தல் கும்பலை சேர்ந்தவர்கள் என்றும் தெரியவந்தது.அவர்களிடம் தொடர்ந்து விசாரணை நடத்தி வருகின்றனர்.