பிரபல டான்ஸர் ரமேஷ் தற்கொலை - கொலையா? என போலீசார் விசாரணை

சென்னையில் டிக்டாக் மூலம் பிரபல டான்ஸராகிய ரமேஷ், தற்கொலையால் உயிரிழந்தார்.

சென்னை: இன்ஸ்டாகிராம் ரீல்ஸ் மூலமாக நடனமாடி வீடியோ வெளியிட்டு சமூக வலைதளங்களில் பிரபலமானவர், டான்ஸர் ரமேஷ்(42). மூர் மார்க்கெட் பகுதிகளில் சினிமா பாடலுக்கு டான்ஸ் ஆடி வெளியிட்ட வீடியோ வைரலாகி பிரபல தனியார் தொலைக்காட்சி நடன நிகழ்ச்சியில் இவருக்கு வாய்ப்பு கிடைத்தது.

இதில் அசத்தி மேலும் பிரபலமான டான்ஸரான ரமேஷுக்கு(Dancer Ramesh), நடிகர் அஜித் நடிப்பில் வெளியான 'துணிவு' மற்றும் நடிகர் ரஜினிகாந்த் நடிப்பில் வெளியாக உள்ள 'ஜெயிலர்' ஆகிய படங்களிலும் சிறு வேடங்களில் நடிக்கும் வாய்ப்பு கிட்டியது. இவர், மூர் மார்க்கெட் பகுதியில் முதல் மனைவி சித்ரா மற்றும் இரண்டு மகள்கள் உடன் வசித்து வந்துள்ளார்.

இந்நிலையில் சமூக வலைதளத்தில் பிரபலமான டான்ஸர் ரமேஷ் இன்று (ஜன.27) மாலை புளியந்தோப்பு பகுதியில் உள்ள கே.பி. பார்க் அடுக்குமாடி குடியிருப்பில் தற்கொலையால் உயிரிழந்ததாக போலீசாருக்குத் தகவல் கிடைத்தது. குறிப்பாக, புளியந்தோப்பு கே.பி. பார்க் பகுதியில் தங்கி இருக்கும் இரண்டாவது மனைவியான இன்பவள்ளி வீட்டிற்குச் சென்றபோது இந்த சம்பவம் நிகழ்ந்துள்ளது.

தற்கொலை எதற்கும் தீர்வல்ல

இதுதொடர்பாக, பேசின் பிரிட்ஜ் போலீசார் விசாரணை செய்ததில், இன்று பிறந்தநாள் என்பதால் பார்ட்டி வைப்பதற்காக பணம் கேட்டு இரண்டாவது மனைவி இன்பவள்ளியிடம் தொந்தரவு செய்ததாகவும், அவர் பணம் தராத காரணத்தினால் தற்கொலை செய்து கொண்டதாகவும் கூறப்படுகிறது. சமூக வலைதளம் மூலம் பிரபலமாகி தொலைக்காட்சிகளில், பல்வேறு நிகழ்ச்சிகளில் பங்கு பெற ஆரம்பித்த உடன் முதல் மனைவி மற்றும் இரண்டாவது மனைவிக்கு இடையே சண்டை ஏற்பட்டுள்ளது.

இரண்டாவது மனைவி இன்பவள்ளி டான்ஸர் ரமேஷை கடத்தி சென்றுவிட்டதாக, முதல் மனைவி சித்ரா மீது கடந்த ஆண்டு ஆகஸ்ட் மாதம் புளியந்தோப்பு காவல் நிலையத்தில் புகார் அளிக்கப்பட்டு விசாரணையும் நடந்தது. இதன் பிறகு, இப்பிரச்னையில் இரண்டு மனைவிகளுக்கும் இடையே சமாதானம் ஏற்பட்ட நிலையில், தற்போது இரண்டாவது மனைவி இன்பவள்ளி தங்கி இருக்கும் குடியிருப்பில் மரணம் அடைந்த விவகாரம் போலீசாருக்கு சில சந்தேகங்களை ஏற்படுத்தி உள்ளது.

முதற்கட்ட விசாரணையில் தற்கொலை? என உறவினர்கள் தெரிவித்தாலும், அதிக குடிப்பழக்கம் இருக்கும் டான்ஸர் ரமேஷ் தவறி விழுந்து உயிரிழந்தாரா? அல்லது பிறந்தநாள் கொண்டாட்டத்திற்குப் பணம் தராததால் தற்கொலை செய்து கொண்டாரா? எனவும் இல்லை, கொலை செய்யப்பட்டாரா? என்பன உள்ளிட்ட பல கோணங்களிலும் பேசின் பிரிட்ஜ் போலீசார் விசாரணை மேற்கொண்டு வருகின்றனர்.

உயிரிழந்த டான்சர் ரமேஷின் உடலை உடற்கூராய்வுக்காக ஸ்டான்லி அரசு மருத்துவமனைக்கு போலீசார் அனுப்பியுள்ளனர். மேலும், இந்த விவகாரம் தொடர்பாக பேசின் பிரிட்ஜ் போலீசார் டான்ஸர் ரமேஷின் உறவினர்களுடன் தீவிர விசாரணையில் ஈடுபட்டுள்ளனர். இந்த சம்பவம் அப்பகுதியில் பெரும் பரபரப்பை ஏற்படுத்தியதோடு, அவரது ரசிகர்களின் மத்தியில் பெரும் சோகத்தை ஏற்படுத்தியுள்ளது.

இதையும் படிங்க: ட்விட்டரில் சூடுபிடிக்கும் AK-63 படத்தின் அப்டேட் - இயக்குநர் யார்?