பிறப்பு, இறப்பை பதிவு செய்யும் காலதாமத கட்டணம் விலக்கு - முதலமைச்சர் அறிவிப்பு!

சென்னை: பிறப்பு, இறப்பு குறித்து பதிவு செய்வதில் காலதாமம் ஏற்படும் பட்சத்தில் விதிக்கப்படும் காலதாமத கட்டணத்திற்கு முதலமைச்சர் ஸ்டாலின் விலக்கு அளித்துள்ளார்.

இதுதொடர்பாக தமிழ்நாடு அரசு வெளியிட்டுள்ள செய்திக்குறிப்பில், "தமிழ்நாட்டில் கரோனா தொற்றை கட்டுப்படுத்தவும், சிகிச்சை வசதிகளை மேம்படுத்தவும் அரசு பல்வேறு நடவடிக்கைகளை எடுத்து வருகிறது.

நமது மருத்துவர்களின் தீவிர முயற்சிகளையும் மீறி தவிர்க்க முடியாத சூழலால் இறப்புகள் நிகழ்ந்து விடுகின்றன. துயரமான இந்த சம்பவத்தில், சில காரணங்களால் இறப்பு குறித்து 21 நாட்களுக்குள் சம்பந்தப்பட்ட பிறப்பு, இறப்பு பதிவாளரிடம் தகவல் தெரிவிக்க வேண்டும்.

பிறப்பு, இறப்பு பதிவுச் சட்டம், 1969, தமிழ்நாடு பிறப்பு இறப்பு விதிகள் 2000-ன்படி இது கட்டாயமாக்கப்பட்டுள்ளது. 21 நாள்கள் முடிந்து 30 நாள்கள் வரை காலதாமதம் ஆகும் பட்சத்தில் அதற்கு கட்டணமாக 100 ரூபாயாகவும், 30 நாள்களுக்குப் பின் ஓராண்டிற்குள் காலதாமதக் கட்டணம் 200 ரூபாயாகவும், ஓராண்டிற்கு மேல் காலதாமதக் கட்டணம் 500 ரூபாய் என வசூலிக்கப்படுகிறது.

கரோனா தொற்றினால் பொதுமக்கள் பெரிதும் பாதிக்கப்பட்டிருக்கும் இந்நேரத்தில், இந்தக் கட்டண முறை ஒரு சுமையை ஏற்படுத்தி வருகிறது. இதனையறிந்த முதலமைச்சர் ஸ்டாலின் இக்கட்டணத்திலிருந்து பொதுமக்களுக்கு விலக்களிக்கவும், அந்தக் காலதாமதக் கட்டணத்தை அரசே ஏற்றுக்கொள்ளும் என்றும் அறிவித்துள்ளார்.

மேலும், “காலதாமத கட்டண விலக்கின் காரணமாக உள்ளாட்சி அமைப்புகளுக்கு ஏற்படக்கூடிய வருவாய் இழப்பை தமிழ்நாடு அரசே ஈடுசெய்யும். இருப்பினும், உரிய காலத்தில் பிறப்பு, இறப்பினை பதிவு செய்ய அனைவரின் ஒத்துழைப்பும் வேண்டும்” என முதலமைச்சர் கேட்டுக்கொண்டார்.

இதையும் படிங்க:'ஓய்வின்றிப் போராடும் கள வீரர்களுக்குத் தேவை ஒன்றே' - மக்களிடம் கேட்கும் மு.க. ஸ்டாலின்