சென்னை:அண்ணா, எம்ஜிஆர், ஜெயலலிதாவோடு பயணித்த பண்ருட்டி ராமச்சந்திரனை மிகவும் தரமற்று பேசியுள்ளதை வன்மையாகக் கண்டிப்பதாகவும்; எடப்பாடி பழனிசாமி, தலைமைப்பண்பு இல்லாதவர் எனவும்; அதிமுகவை அழிப்பதற்கென்றே ஈபிஎஸ் ஒரு சூனியமாக வந்துள்ளார் எனவும் ஓ.பன்னீர்செல்வத்தின் ஆதரவாளர் கோவை செல்வராஜ் தெரிவித்துள்ளார்.
தலைமைப் பண்பு அற்ற ஈபிஎஸ்:சென்னை பசுமை வழிச்சாலையில் உள்ள ஓ.பன்னீர்செல்வத்தின் இல்லத்தில் செய்தியாளர்களைச் சந்தித்துப்பேசிய ஓ.பன்னீர்செல்வத்தின் ஆதரவாளர் கோவை செல்வராஜ், "இரண்டு நாட்களுக்கு முன்பு எடப்பாடி பழனிசாமி செங்கல்பட்டு ஆர்ப்பாட்டத்தில் எந்த கோரிக்கைக்கு சென்றாரோ? அந்த கோரிக்கையை மறந்துவிட்டு கட்சியினுடைய மூத்த தலைவர் அண்ணா, எம்ஜிஆர், ஜெயலலிதாவோடு பயணித்த பண்ருட்டி ராமச்சந்திரனை மிகவும் தரமற்று பேசியுள்ளதை வன்மையாகக் கண்டிக்கிறோம். பண்ருட்டி ராமச்சந்திரன் அரசியலுக்கு வரும்போது, எடப்பாடி பழனிசாமி அரை டவுசர் அணிந்து பள்ளிக்கூடம் படித்துக்கொண்டிருப்பார். எடப்பாடி பழனிசாமி தலைமைப் பண்பு இல்லாதவர்.
மக்கள் பணியை மறப்பதா?ஜெயலலிதாவால் நல்ல தலைவர் எனப்பெயர் எடுத்தவரை, எடப்பாடி பழனிசாமி கொச்சைப்படுத்தி வருகிறார். ஓ.பன்னீர்செல்வத்தை ஆதரிப்பவர்களை எல்லாம் எடப்பாடி பழனிசாமி விமர்சிக்கிறார். அவர் முதலமைச்சரான பிறகு அதிமுக நான்காக பிரிந்துள்ளது. அதிமுக மக்கள் பிரச்னையினை எடுத்து வைக்காமல் உட்கட்சி சண்டையிட்டுக்கொண்டுள்ளதற்கு காரணம் எடப்பாடி பழனிசாமி தான்.