'ஹைட்ரோ கார்பன் எடுக்க அனுமதி அளிக்க கூடாது..!' - இயக்குநர் கவுதமன்

சென்னை: "விழுப்புரம், கடலூர், நாகப்பட்டினம் ஆகிய மாவட்டங்களில் ஹைட்ரோ கார்பன் எடுக்க வேதாந்தா நிறுவனத்திற்கு அனுமதி அளிக்க கூடாது" என்று, இயக்குநர் கவுதமன் தெரிவித்துள்ளார்.

சென்னையில் செய்தியாளர்களிடம் அவர் கூறியதாவது,

தமிழ்நாட்டின் வளத்தினை கொள்ளையடிப்பதில் மத்தியிலுள்ள மோடி அரசு ஈவு இரக்கமின்றி நடந்து வருகிறது. உழவுத் தொழிலை திட்டமிட்டு தமிழகத்தில் அழிப்பது எந்தவிதத்திலும் நியாயமாகாது. ராக்கெட்டில் சென்றாலும் தண்ணீர் குடிப்பதற்கு தரைக்குதான் வரவேண்டும்.

டெல்டா மாவட்டங்களில் ஓஎன்ஜிசி நிறுவனத்தின் மூலம் 5000 சதுர கிலோமீட்டர் பரப்பளவில் 600 எண்ணெய் கிணறுகள் தோண்டி இயங்கிக் கொண்டு வருகின்றன. அதேபோல் நாகப்பட்டினம், கடலூர், விழுப்புரம் ஆகிய மாவட்டங்களில் பெட்ரோலிய பொருட்கள் எடுப்பதற்கான பணிகள் தொடங்கப்பட்டுள்ளது. மாநில அரசு இந்தத் திட்டங்களை நடைமுறைப்படுத்த விடமாட்டோம் என ஆரம்ப நிலையிலேயே தடைவிதிக்க வேண்டும்.

காவிரி டெல்டா பகுதிகளில் எண்ணைய் குழாய் அமைப்பதற்கு முன்னாள் முதலமைச்சர் ஜெயலலிதா மத்திய அரசிற்கு எதிராக தடைவிதித்து அரசாணை வெளியிட்டுள்ளார். அந்த தடையை நீக்கியது யார்? என்பதை அரசு மக்களுக்குத் தெரிவிக்க வேண்டும். வேதந்தா நிறுவனம் மக்களிடம் சென்று அனுமதி பெறாமல், மத்திய அரசிடமும் முழு அனுமதி பெற்றுள்ளது. இதற்கு மாநில அரசு ஒருபோதும் சம்மதம் தெரிவிக்கக்கூடாது, என்றார்.