காஞ்சிபுரத்தில் சிறுமிக்கு பாலியல் கொடுமை! கம்யூனிஸ்ட் கண்டனம்

சென்னை: மனநலம் பாதிக்கப்பட்ட சிறுமிக்கு நேர்ந்த பாலியல் வன்முறைக்கு காவல் துறையின் அலட்சியமே காரணமென மார்க்சிஸ்ட் கம்யூனிஸ்ட் கட்சி கண்டனம் தெரிவித்துள்ளது.

காஞ்சிபுரத்தில் மனநலம் பாதிக்கப்பட்ட சிறுமியை சில கொடூரர்கள் பாலியல் வன்கொடுமை செய்து சாலையில் வீசப்பட்ட கொடூரத்திற்கு கண்டனம் தெரிவித்து மார்க்சிஸ்ட் கம்யூனிட் கட்சி இன்று அறிக்கை ஒன்றை வெளியிட்டுள்ளது.

அதில் குறிப்பிட்டுள்ளதாவது, 'காஞ்சிபுரத்தில் வீட்டு அருகே நின்று கொண்டிருந்த 15 வயது மனநலம் பாதிக்கப்பட்ட சிறுமியை ஏப்ரல் 3 அன்று சமூக விரோதக் கும்பலைச் சேர்ந்தவர்கள் தூக்கிச் சென்று கூட்டு பாலியல் வன்கொடுமை செய்து சாலையில் வீசப்பட்ட சம்பவம் பெரும் அதிர்ச்சியையும், ஆத்திரத்தையும் ஏற்படுத்தியுள்ளது. கோவை துடியலூரில் சிறுமி பாலியல் வல்லுறவுக்கு ஆளாக்கப்பட்டு படுகொலை செய்யப்பட்ட சம்பவம் மக்கள் மனதில் இருந்து இன்னும் நீங்காத நிலையில், காஞ்சிபுரத்தில் மனநலம் பாதிக்கப்பட்ட சிறுமி பாலியல் வல்லுறவுக்கு உள்ளானது தமிழ்நாடு மக்கள் மத்தியில் பெரும் பதற்றத்தையும், அச்சத்தையும் ஏற்படுத்தியுள்ளது. இக்கொடூரமான சம்பவத்தை மார்க்சிஸ்ட் கம்யூனிஸ்ட் கட்சியின் மாநில செயற்குழு வன்மையாக கண்டிக்கிறது.

இச்சம்பவத்தன்று மாலை 5 மணியளவில் சிறுமியின் பெற்றோர் காவல்நிலையத்தில் சிறுமியை காணவில்லை என புகார் கொடுத்துள்ளனர். அப்போதே உடனடியாக காவல் துறை செயலில் இறங்கியிருந்தால் சிறுமியை மீட்டிருக்க முடியும். ஆனால், காவல்துறை காலம் கடத்தியதன் விளைவாக, அச்சிறுமி அன்றிரவு முழுவதும் பாலியல் வல்லுறவுக்கு உள்ளாக்கப்பட்டு உடல் முழுவதும் காயங்களுடன் சாலையில் வீசப்பட்டுள்ளார்.

பொள்ளாச்சியில் இளம் பெண்கள் பாலியல் கொடுமைக்கு உள்ளாக்கப்பட்டது, துடியலூரில் சிறுமி கொலை சம்பவம் போன்று அடுக்கடுக்கான சம்பவங்கள் நடைபெற்ற போதிலும் காவல்துறை துடிப்புடன் செயல்பட மறுத்துவருவது ஆழ்ந்த வருத்தத்தையும், வேதனையையும் அளிக்கிறது,

இச்சம்பவம் குறித்து காவல் துறை கண்காணிப்பாளரிடம் நேரில் புகார் தெரிவிக்கச் சென்ற அனைத்து வகை மாற்றுத் திறனாளிகளின் சங்கத் தலைவர்களிடம் காவல்துறை கண்காணிப்பாளர் உண்மைக்கு மாறாக பாதிக்கப்பட்ட சிறுமி மாற்றுத்திறனாளி இல்லை எனவும், வழக்கின் முதல் தகவல் அறிக்கை பெற்றோருக்கு அளிக்கப்பட்டது என்றும் கூறி குழப்ப முயற்சி செய்துள்ளது வன்மையான கண்டனத்திற்குரியதாகும்.

காஞ்சிபுரத்தில் இதுபோன்று தொடர்ந்து செயல்பட்டுவரும் சமூக விரோதக் கும்பல் இச்சம்பவத்திற்கு பின்னால் இருப்பதாக கருத வேண்டியுள்ளது. வழக்கை மூடிமறைக்கவும், புகாரை திரும்பப் பெற வேண்டுமெனவும் இக்கும்பல் நிர்ப்பந்தப்படுத்தி வருவதாகவும், இதன் காரணமாகவே காவல்துறை மெத்தனமாக இருப்பதாக தோன்றுகிறது.

எனவே, தமிழ்நாடு அரசு வேறு பொருத்தமான மூத்த பெண் காவல்துறை அலுவலரை பொறுப்பாக நியமித்து இவ்வழக்கை விசாரிக்க வேண்டும். இச்சம்பவத்தில் சம்பந்தப்பட்டுள்ள அனைத்து குற்றவாளிகளையும் கைது செய்ய வேண்டும். வழக்கு முடியும் வரை கைது செய்யப்பட்டுள்ளவர்களை பிணையில் வெளிவராத வகையில் உரிய விழிப்புடன் இருந்து இவர்களுக்கு தண்டனை பெற்றுத் தருவதற்கு உரிய நடவடிக்கை எடுக்க வேண்டுமென மார்க்சிஸ்ட் கம்யூனிஸ்ட் கட்சியின் சார்பில் வற்புறுத்திக் கேட்டுக் கொள்கிறோம்.

மேலும், புகார் அளித்துள்ள குடும்பத்தினருக்கு சமூக விரோத சக்திகள் மூலம் மிரட்டல்கள் விடப்படாமல் இருப்பதற்கு காவல் துறை உரிய பாதுகாப்பு வழங்கிட நடவடிக்கை மேற்கொள்ள வேண்டுமென மார்க்சிஸ்ட் கம்யூனிஸ்ட் கட்சி சார்பில் கேட்டுக் கொள்கிறோம்' என்று தெரிவிக்கப்பட்டுள்ளது.