சென்னையில் 1,368 ஆக உயர்ந்த கட்டுப்படுத்தப்பட்ட பகுதிகள்!

சென்னையில் 1,368 கட்டுப்படுத்தப்பட்ட பகுதிகள் உள்ளதாக, மாநகராட்சி தெரிவித்துள்ளது.

கரோனா தொற்றின் 2 ஆம் அலை தீவிரமாகப் பரவி வருகிறது. தொற்றைக் கட்டுப்படுத்த கிருமி நாசினி தெளித்தல், மக்களுக்கு முகக்கவசம் வழங்குதல், மருத்துவ முகாம்கள் அமைத்தல் உள்ளிட்ட பல்வேறு நடவடிக்கைகளை மாநகராட்சி நிர்வாகம் மேற்கொண்டு வருகிறது.

கடந்தாண்டு ஒருவருக்கு கரோனா தொற்று உறுதி செய்யப்பட்டால், அந்த முழு தெருவும் மூடப்பட்டு மாநகராட்சியால் கட்டுப்படுத்தப்பட்ட பகுதியாக அறிவிக்கப்படும். இதன் காரணமாக, பொது மக்கள் கடும் இன்னல்களை எதிர்கொண்டனர்.

தற்போது ஒரு தெருவில் மூன்று முதல் ஐந்து வீடுகளில் கரோனா தொற்று இருந்தால் மட்டுமே, அதனை கட்டுப்படுத்தப்பட்ட பகுதியாக மாநகராட்சி அறிவித்து வருகிறது. அதன்படி, சென்னையில் தற்போது 1,368 கட்டுப்படுத்தப்பட்ட பகுதிகள் உள்ளன.

375 தெருக்களில் ஆறுக்கும் மேற்பட்டோர் கரோனாவால் பாதிக்கப்பட்டுள்ளனர். மேலும் 993 தெருக்களில் பத்துக்கும் மேற்பட்டோர் கரோனாவால் பாதிக்கப்பட்டுள்ளனர் என்று சென்னை மாநகராட்சி நிர்வாகம் தெரிவித்துள்ளது.