ரத்தத்தை குடிக்கும் தலைவர்கள்- உட்கட்சி பூசலில் கொந்தளித்த ஜோதிமணி

சட்டப்பேரவைத் தேர்தலுக்கான காங்கிரஸ் வேட்பாளர்களை தேர்வு செய்வதில் நடைபெறும் குளறுபடிகளை அடுத்து, காங்கிரஸ் கட்சியில் தொண்டர்களின் ரத்தத்தை குடிக்கும் மனசாட்சியற்ற தலைவர்கள் நியாயத்தின் குரலுக்கு செவிமடுக்கவில்லை என காட்டமாக கருத்து தெரிவித்துள்ளார்.

சென்னை:வரும் சட்டப்பேரவைத் தேர்தலில் திமுகவுடன் கூட்டணி வைத்துள்ள காங்கிரஸ் கட்சிக்கு 25 சட்டப்பேரவைத் தொகுதிகள் மற்றும் கன்னியாகுமரிக்கான மக்களவைத் தொகுதிகள் ஒதுக்கப்பட்டுள்ளன. இந்தத் தேர்தலில் காங்கிரஸ் கட்சி சார்பாக போட்டியிடும் வேட்பாளர்கள் பட்டியல் தயார் செய்யும் பணி நடைபெற்ற நிலையில், கட்சியிலிருந்து பிரிந்து மீண்டும் கட்சியில் வந்து தன்னை இணைத்துக் கொண்டவர்களை தேர்தலில் போட்டியிட அனுமதிக்கக்கூடாது என எம்பி விஷ்ணுபிரசாத் மற்றும் அவரது ஆதரவாளர்கள் காங்கிரஸ் கட்சி அலுவலகத்தை முற்றுகையிட்டு ஆர்ப்பாட்டம் நடத்தி வருகின்றனர்.

இதற்கிடையில், காங்கிரஸ் தலைவர்களின் இந்த நடவடிக்கைக்கு எதிர்ப்பு தெரிவிக்கும் விதமாக கரூர் எம்பி ஜோதிமணி ட்விட்டரில் காட்டமாக கருத்துகளைப் பதிவிட்டிருந்தார். அதில், "காங்கிரஸ் தொண்டர்களின் மனதில் தற்போது கொந்தளித்துக்கொண்டிருக்கின்ற உணர்வுகளை நான் அறிவேன். தொகுதி, வேட்பாளர் தேர்வு வெளிப்படையாக இல்லை. நிறைய தவறு நடக்கிறது. தட்டிக்கேட்டேன். பதிலில்லை. தொண்டர்களின் ரத்தத்தை குடிக்கும் மனசாட்சியற்ற தலைவர்கள் நியாயத்தின் குரலுக்கு செவிமடுக்கவில்லை.

நீண்ட காலம் கட்சிக்கு உழைத்த வெற்றி வாய்ப்புள்ள உண்மையான விசுவாசிகள் புறக்கணிக்கப்படுவதை ஏற்றுக்கொள்ள முடியாது. பணம் இருந்தால் யார் வேண்டுமானாலும் சீட் பெறமுடியும் என்பது அக்கிரமம். காங்கிரஸ் கட்சி தொண்டர்களின் ரத்தத்திலும், வியர்வையிலும் உருவானது. இதை அழிக்க யாருக்கும் உரிமையில்லை.

எனது தலைவர் ராகுல் காந்தி பணம்தான் பிரதானமென நினைத்திருந்தால் இன்று நான் எம்பி கிடையாது. இந்த தலைவர்கள் தொண்டர்களுக்கு மட்டுமல்ல தன்னை நம்பிய தலைவருக்கும் துரோகம் செய்கிறார்கள். நமது கட்சியையும், நமது தலைவரின் கௌரவத்தையும் தொண்டர்களாகிய நாம்தான் காப்பாற்றிக்கொள்ள வேண்டும்.

உண்மையான கட்சி விசுவாசிகளுக்கு கண்முன்னால் இழைக்கப்படும் துரோகத்தை கண்டு எனது ரத்தம் கொதிக்கிறது. எனது யுத்தத்தை நான் தொடர்வேன். தொண்டர்களின் குரலாக தொடர்ந்து ஒலிப்பேன். நடப்பது நடக்கட்டும். எதிரிகளை மட்டுமல்ல துரோகிகளையும் எதிர்கொள்ளும் வலிமை நமக்கு உண்டு" எனக் குறிப்பிட்டிருந்தார்.

இவரது இந்தப் பதிவு காங்கிரஸ் கட்சியில் பல்வேறு குளறுபடிகள் நடந்துவருவது உண்மை என்பதை உணர்த்தும் வகையில் உள்ளது.